Ońtústik jastary latyn álipbiine kóshýdi qoldaidy. Bul týraly Ońtústik Qazaqstan oblysy jastar saiasaty máseleleri basqarmasynyń basshysy Balmarjan Narbekova men óńirdegi jastar ortalyǵynyń direktory Bereke Dúisebekov málim etti.
«Elbasy Nursultan Ábishuly Nazarbaev 2025 jyldan bastap, latyn álipbiin qoldanysqa engizý kerektigin aitty. Búgingi kompiýter zamanynda internet júiesinde ústemdik etetin latyn álipbii ekendigin moiyndaýymyz kerek. Latynǵa kóshkenimizde utatyn tustarymyz bar», deidi OQO jastar saiasaty máseleleri basqarmasynyń basshysy Balmarjan Narbekova.
Onyń pikirinshe, birinshiden, bul til tazalyǵy máselesine qatysty. Tilimizdegi qazirgi jat dybystardy tańbalaityn áripterdi qysqartyp, sol arqyly qazaq tiliniń tabiǵi taza qalpyn saqtaýǵa múmkindik alamyz. Ekinshiden, qazaq tilin oqytqan ýaqytta basy artyq tańbalarǵa qatysty emle, erejelerdiń qysqaratyny belgili. Ol mektepten bastap barlyq oqý oryndarynda oqytý úrdisin jeńildetedi. Ýaqyt ta, qarjy da únemdeledi. Úshinshiden, latyn álipbiine kóshý - qazaq tiliniń halyqaralyq dárejege shyǵýyna jol ashady. Qazaq tiline kompiýterlik jańa tehnologiialar arqyly halyqaralyq aqparat keńistigine kirigýge tiimdi joldar ashylady.
«Tórtinshiden, túbi bir túrki dúniesi, negizinen, latyndy qoldanady. Bizderge olarmen rýhani, mádeni, ǵylymi, ekonomikalyq qarym-qatynasty, tyǵyz bailanysty kúsheitýimiz kerek. Ol da tabiǵi is ekendigin aitqymyz keledi», - dep atap ótti Balmarjan Narbekova.
«Qazaq eli táýelsizdik alǵanyna jiyrma altynshy jylǵa aiaq basty. Búgingi jastar elimizdiń órkendegenin, jyldan-jylǵa damyp kele jatqandyǵyn kórip otyr. Olar azat rýhta tárbielenip, ózderiniń bai tarihyna maqtana alatyndai sezimde boi túzeýde», - deidi OQO jastar ortalyǵynyń direktory Bereke Dúisebekov.
Onyń pikirinshe, otarshyldyq sanada emes, táýelsizdik rýhtaǵy qazirgi qazaq jastary ultyn súietin patriottyq sezimde qalyptasyp keledi.
«Biz jastar latyn álipbiine kóshe otyryp, órkenietti elderdiń qataryna qosylyp, tilimizdegi dybystyq júielerdi naq anyqtap, qazaq tiliniń jazylýy men dybystalý kezinde sózder qoldanysyndaǵy artyq kirme sózderden arylamyz dep senimmen aita alamyz. Latyn álipbiine kóshý - biz jastar úshin, bolashaq elimiz úshin áldeqaida mańyzdyraq!», - dep atap ótti B. Dúisebekov.
