Taiaý kúnderi ońtústik óńirlerde munai ónimderine qatysty jaǵdai turaqtanady. Bul týraly QR Energetika vitse-ministri Áset Maǵaýov málim etti, dep habarlaidy "Ult aqparat".
«13 maýsymnan bastap Shymkent munai óńdeý zatynda benzin óndirisi tehnologiialyq rejimge shyqty, sońǵy 5 kúnde ortasha táýliktik óndirý 6,5 myń tonnany qurady. Dizel otynynyń óndirisi qalpyna keltirildi, sońǵy 4 kúnde ortasha táýliktik óndirý 6 myń tonnany qurady. Óndiristiń bul kólemi ońtústik óńirdiń qajettilikterin jaýyp tur», - dep toqtaldy Maǵaýov Ortalyq kommýnikatsiialar qyzmetinde.
Onyń aitýynsha, elimizdiń ońtústik óńirlerinde munai ónimderin táýliktik tutyný: Ai-92 benzini boiynsha 5,31 myń tonnany, al dizel otyny boiynsha 5,6 myń tonnany quraidy.
«Sonymen qatar, jóneltip tieýge qatysty Shymkent munai óńdeý zatynyń logistikalyq qiyndyqtary boldy. Sońǵy kúnderi óndirilgen munai ónimderiniń tek jartysyn ǵana jóneltý múmkin bolǵan. «QTJ»-AQ-birlesip tiisti konsýltatsiialar júrigilip, otyndy jóneltý kólemi qalpyna keltirildi. Aldaǵy kúnderi temir jolmen 4,3 myń tonna benzin men 4,2 myń tonna dizel otyny ońtústik óńirlerge jóneltilmek. Buǵan qosa, Shymkent munai bazasy arqyly qubyrmen 1,2 myń tonnadan benzin men dizel otyny baǵyttalady. Osydan keiin avtomobil kóligimen janar-jaǵarmai quiý stantsiialary júielerine taratylady. Bul qadamdar taiaý kúnderi jaǵdaidy turaqtandyrýǵa múmkindik beredi», - dedi vitse-ministr.
2021 jyldyń 5 aiynyń qorytyndysy boiynsha munai óńdeý kólemi elimizde 6,7 mln tonnany qurady.
Munymen qosa, ol buǵan deiin Atyraý munai óńdeý zaýytynda elektr energiiasyn jetkizýdegi aqaýǵa bailanysty tiisti irkilister bolǵanyn eske saldy. Jalpy, ótken jylmen salystyrǵanda fizikalyq kólem indeksi munai óńdeý boiynsha 109, 5 paiyzdy qurady. 1 mln 853 myń tonna benzin, 1 mln 879 myń tonna dizel otyny shyǵaryldy.
