Qazaqstannyń ońtústik óńirleriniń turǵyndary basqa óńirlermen salystyrǵanda nesieni kóbirek alatyn bolyp shyqty. Bul týraly Ranking.kz sarapshylarynyń zertteýinde aitylady, dep habarlaidy Ult.kz tilshisi Tengrinews.kz-ke silteme jasap.
Sarapshylardyń málimetinshe, 2017 jyly elimizde nesie alýshylardyń sany birden 12,4 paiyzǵa (501,2 milliard teńgege) jetken.
"Qazaqstan óńirleriniń ishinde Almaty oblysynyń turǵyndary nesieni kóbine tutynýshylyq maqsatta alady - 80 paiyzdan kóbi. Mysaly, turmystyq tehnika, jihaz alý úshin, eńbek demalysy, úilený toiy, taýarlardy nesie alý (bólip tóleý) jáne taǵy da basqa maqsattarda. Osylaisha, bir jylda tutynýshylyq nesie kólemi 23 paiyzǵa - 22,8 milliard teńgege ósti", - delingen mamandardyń zertteýinde.
Tutynýshylyq nesieni jii alatyndardyń qatarynda Qyzylorda oblysy bar eken. Onda jeke tulǵalar alǵan nesie kólemi bir jylda birden 22,1 paiyzǵa, iaǵni, 105,2 milliard teńgege deiin jetken.
Sondai-aq, sarapshylardyń zertteýinde Ońtústik Qazaqstan oblysy turǵyndarynyń óte jii nesie alatyny aitylady. Mamandardyń aitýynsha, OQO-da jeke tulǵalar alǵan nesieniń kólemi 72,3 paiyzǵa deiin ósken. 2017 jyly bul kórsetkish 18,2 paiyzǵa ósip, 197,4 milliard teńgege jetken.
Al nesie kólemi azaiǵan óńirlerdiń qatarynda Almaty qalasy tur. Onda nesie kólemi bir jylda 1,9 milliard teńgege qysqarǵan eken.
