Ońtústik Koreiada kishkentai balany qaǵyp ketip, sońynan elden ketip qalǵan Qazaqstan azamaty tergeý is-sharalaryna qatysý úshin Seýl qalasyna óz erkimen ushyp keldi. Bul jóninde Syrtqy ister ministrliginiń baspasóz qyzmeti habarlady.
«Qazaqstan Respýblikasy azamatynyń Koreiaǵa kelý barysy elshilik qyzmetkerleriniń baqylaýynda ótti. Diplomattar jeke suhbat barysynda onyń quqyqtaryn túsindirip, tergeý kezinde ózin qalai ustaýy kerektigi týraly keńes berdi» delingen habarlamada.
Qazirgi ýaqytta otandasymyz Changvon qalasynyń tergeý izoliatorynda qamaýda otyr. Elshilik bul máseleni udaiy baqylaýda ustaidy.
Rionhap agenttiginiń habarlaýynsha, oqiǵa ótken aida Ońtústik Kionsan provintsiiasynda bolǵan. Bastaýysh mektepte oqityn balany kólik qaǵyp ketkennen keiin densaýlyǵyna úlken zaqym kelgen, dep habarlaidy Ulttyq politsiia agenttigi.
Miyna qan quiylǵan bala oqiǵadan keiin es-tússiz jatqan.
Aqparat agenttigi qazaqstandyq zańsyz immigranttyń júrgizýshi kýáligi bolmaǵanyn atap ketti. Ol basqa adamnyń atyna tirkelgen kólikti aidaǵan. Sondyqtan politsiia jol apatyna kináli adamdy ýaqytynda anyqtai almai, elden ketýge tyiym sala almaǵan.
Kúdiktige halyqaralyq izdeý jariialanǵannan keiin Ońtústik Koreia politseileri qazaqstandyq áriptesterine atalmysh oqiǵaǵa qatysty shara qabyldaýdy ótindi. Osylaisha olar qazaqstandyq politsiiamen birlesip, zań buzýshynyń júrgen jerin anyqtady.
Sondai-aq, Ońtústik Koreia qazaqstandyq áriptesterine kúdiktini Seýlge ekstradatsiialaý týraly ótinish bildirdi. Seýldegi Qazaqstan elshiliginiń kómegimen ońtústikkoreialyq tarap jas jigitti óz erkimen elge qaitýǵa kóndire aldy.
Qazaqstandyq Interpol júrgizgen tergeý barysynda er adam jasaǵan qylmysyn moiyndap, Ońtústik Koreianyń politsiiasyna berilý jóninde sheshim qabyldady.
Eske sala keteiik, biraz ýaqyt buryn Qazaqstan azamaty Ońtústik Koreiada kishkentai balany qaǵyp, oqiǵa ornynan izin sýytqan bolatyn. Biraz ýaqyttan keiin onyń Pavlodarda júrgeni belgili boldy.
Osy jaǵdaidan keiin Ońtústik Koreianyń bilik ókilderi zańsyz júrgen sheteldik azamattarǵa elden aldyn ala eskertýsiz shyǵýǵa tyiym salatynyn málim etti.
