Ońtústik Koreiada bir top otandasymyz taǵy tutqynǵa túsip qaldy. Elý shaqty azamatty áýejai qyzmetkerleri birden jertólege túsirgen. Biraq ne úshin ustaǵandaryn eshkimge táptishtep túsindirmepti. Tek ushaqtan túsken boida suraq-jaýaptyń astyna alyp, tar jerge qamap qoiǵan. Árqaisy ártúrli sharýamen barǵan qazaqstandyqtar osylaisha 5 kúnnen beri jipsiz bailanyp otyr, - dep habarlaidy KTK.
Til bilmeitin Qazaqstan azamattary tilmash ta taba almai, birneshe kúnnen beri ash jatqanyn habarlaǵan.
"Tek káris tilinde sóilesińder deidi. Tilmash joq bolǵandyqtan tamaq surap ishe almai otyrmyz. Biraz jigitter aýyryp jatyr. Kúnine azdaǵan sýsyn men jarty nan beredi, boldy", - deidi Jasulan Ánýarbaev.
Jat eldiń jertólesine qamalǵan otandastarymyz sol jaqtan qonaqúige tapsyrys berip, qaitar biletterin de alǵan eken. Biraq 5 kúnnen beri qamaýda qalyp, shash etekten shyǵynǵa battyq dep shyryldap otyr.
"Barlyǵymyz qonaq úidiń aqshasyn tólep qoiǵanbyz. Saqtandyrý qujattarymyz bar. Jeke basym Koreiany kórýge kelgen edim. Biraq qazir jertólede jatyrmyz", - deidi Handamir Qudiretov.
Al elimizdiń Syrtqy ister ministrligi Ońtústik Koreiada tek 16 azamattyń baryn rastady. Qazir olardyń máselesimen sol jaqtaǵy elshiler ainalysyp jatyr eken.
Syrtqy ister ministrliginiń málimetinshe, jat elde jipsiz bailanǵan otandastarymyz kóshi-qon zańyn buzǵany úshin Koreiaǵa kirgizilmepti. Sondyqtan, olardyń bir toby elge deportatsiialanǵan. Inchhon áýejaiynda áli úsh otandasymyz qalypty. Olar Qazaqstanǵa erteń qaitarylady (Derekkóz: KTK).
