Ońtústik Qazaqstan oblysynyń sapaly et eksporttaý áleýeti artyp keledi. Jyl basynan bergi on aida óńirde 173,2 myń tonna et óndirilgen. Bul agrarly aimaqtyń etti eksporttaýdaǵy shekteýlerin joiyp, jańa naryqqa jol ashyp otyr, dep habarlaidy "Ult aqparat".
Máselen, osy jyldyń segiz aiynda óńirden 330 tonnadan astam iri qara mal men qoi eti jáne «Ordabasy qus» JShS somasy 1 mlrd. 708 mln. teńge bolatyn 2 485 tonna kúrke taýyq etin alys-jaqyn shetelderge eksporttaǵan. Óńirdiń eksporttyq áleýetin arttyrý boiynsha Iran Islam Respýblikasyna júgeri men qoi etin tasymaldaý máselesi boiynsha qarqyndy jumystar júrgizilip jatsa, búginde Saýd Arabiia, BAÁ men Irak memleketterine qoi etin eksporttaý boiynsha aldyn-ala kelisimder bar.
Bul baǵyttaǵy jumystar Elbasynyń Ult jospary - bes institýtsionaldyq reformasyn júzege asyrýdyń 100 naqty qadamynyń 61-qadamynda kórsetilgen et óndirisi men óńdeýdi damytý úshin strategiialyq investorlardy tartý boiynsha atqarylǵan jumystardyń nátijesi bolmaq.
Aita keteiik, 2016 jyly oblystan etke 6 700 bas usaq mal, 400 bas iri qara mal men 200-ge tarta jylqy eti eksporttaldy. Onyń ishinde «Qaiyp Ata» JShS Birikken Arab Ámirliginiń MYCo Trading FZE kompaniiasymen birlese otyryp 2000 bas qoidy Fýdjeira qalasyna jetkizgen. Sonymen qatar, jylyna 3 myń tonna qoi etin eksporttaý boiynsha Irandyq GO HARD TALAYI PASARGAD kompaniiasymen kelisim-shart túzilgen.
Jalpy Ońtústik Qazaqstan oblysynda mal sharýashylyǵy baǵytynda ósim baiqalady. Máselen, iri qara maldyń sany ótken jyldyń tiisti kezeńimen salystyrǵanda 5,9 paiyzǵa artyp 925,6 myń basty, qoi men eshki 1,2 paiyzǵa artyp 4 mln. 092 myń basty, jylqy 19,7 paiyzǵa kóbeiip 285 myń basty, túie 6,8 paiyzǵa, iaǵni, 25,5 myń basty, al qus sany 2,3 paiyzǵa kóbeiip 2,5 mln basty quraǵan.
