Elbasymyz Qazaqstan halqyna arnalǵan Joldaýynda memlekettik-jekemenshik áriptestikti damytý máselesine kóńil aýdarý qajettiligin atap ótken bolatyn. Osyǵan orai Ońtústik Qazaqstan oblysynda memlekettik-jekemenshik áriptestigi aiasynda jalpy quny 9,3 mlrd teńgeni quraityn 13 jobany júzege asyrý josparlanyp otyr. Bul týraly búgin óńirimizdegi memlekettik-jekemenshik áriptestik aiasynda salynyp jatqan nysandarǵa uiymdastyrylǵan press-týr barysynda oblystyq ekonomika jáne biýdjetti josparlaý basqaramasynyń basshysy Arman Sábitov málim etti, dep habarlaidy "Ult aqparat".
Tilshiler toby eń aldymen Shymkent qalasyndaǵy 350 oryndyq balabaqsha men «Qaitpas-1» móltek aýdanyndaǵy 500 oryndyq qalalyq emhananyń qurylys barysymen tanysty. Munan soń olar Túlkibas aýdanyndaǵy 100 oryndyq balabaqshaǵa aialdady. Atalǵan nysandar da memlekettik-jekemenshik áriptestik aiasynda boi kóterýde.
Aita keteiik, búginde memlekettik-jekemenshik áriptestik aiasynda oblysymyzda 13 joba iske asyrylýda. Bul jóninde oblysymyz respýblikada aldynǵy qatarda tur. Onyń 8-i bilim, 3-ýi sport, 2-ýi densaýlyq saqtaý salasynda júzege asyp jatyr. Búginde atalǵan 13 jobanyń 8-ine konkýrsy jariialanyp, 20 jobanyń tiisti qujattary ázirlenýde.
«Ońtústik Qazaqstan oblysynda memlekettik-jekemenshik áriptestik aiasynda investorlar tartý isi jandanyp keledi. Bul rette sheteldik jáne jergilikti kásipkerlerdiń de qyzyǵýshylyǵy basym bolyp otyrǵanyn aita ketý kerek. Osy tetik arqyly biz biýdjet qarjysyn úndemdep qana qoimai, áleýmettik mańyzdy máselelerdi sheshýge múmkindik alamyz», - deidi Arman Sábituly.
Jýyrda ǵana Shymkent qalasyndaǵy jedel-járdem stansasyn modernizatsiialaý jobasyn iske asyrý maqsatynda sheteldik investormen kelisim-shart túzilgen bolatyn. Jalpy túzilgen kelisim-shart sany boiynsha oblys respýblikada aldyńǵy qatarda tur.
Budan bólek, memlekettik-jekemenshik áriptestik tetigi arqyly Shymkent qalasynda onkologiialyq ortalyq qurylysy, Shymkent qalasyndaǵy 200 oryndyq ońaltý ortalyǵynyń qurylysy, «Qaýipsiz qala», Shymkent jáne Túrkistan qalalalarynyń kóshelerin jaryqtandyrý jáne t.b. jobalaryn iske asyrý josparlanýda.
Jalpy, memlekettik-jekemenshik áriptestigi – bul qoǵamdyq mańyzdy jobalardy júzege asyrýǵa jeke investitsiialardy tarta otyryp, tiimdi basqarýǵa, sondai-aq birqatar memlekettik qyzmetterdi jeke sektorǵa berýge baǵyttalǵan memleket pen jeke biznes arasyndaǵy yntymaqtastyq bolyp tabylady.
