Foto: Africa Facts Zone/H
21 qyrkúiekte Ońtústik Afrikada kútpegende qar jaýyp, birneshe tas jolda kólik qozǵalysy toqtap qaldy. Bul týraly France 24 telearnasy habarlady.
Iohannesbýrg pen shyǵys jaǵalaýdaǵy Dýrban qalasyn bailanystyratyn N3 tasjoly jabylǵan. Keibir aýdandarda eki metrge deiin qar jaýdy. Júrgizýshiler kólikte túneýge májbúr boldy.
Qutqarý jumystaryna tótenshe jaǵdailar qyzmetimen qatar ásker de jumyldyryldy.
KvaZýlý-Natal provintsiiasynyń úkimeti qiyn jaǵdaiǵa tap bolǵan keibir júrgizýshiler kórpe-jastyq pen azyq-túlik jetkizip bergen.
Jol qozǵalysyn basqarý korporatsiiasynyń qoǵammen bailanys jónindegi qyzmetkeri júk kólikteri 20 qyrkúiekten beri jol jieginde turǵanyn aitqan.
— Provintsiialar arasynda qatynaityn avtobýstar janar-jaǵarmai quiý beketterinde shamamen jeti saǵat toqtady, — dedi ol.
Ońtústik Afrika meteorologiialyq qyzmeti oqiǵany «ekstremaldy jaǵdai» dep sipattap, aldaǵy saǵattarda taǵy da qar jaýýy múmkin ekenin eskertti.
2023 jyldyń jazynda Ońtústik Afrikada sońǵy 10 jylda alǵash ret qar jaýdy. Ol kezde qar biylǵydai úlken qiyndyq týdyrmaǵan.
