Búgin mádeniet jáne sport ministri Dáýren Abaevtyń tóraǵalyǵymen Úkimet janyndaǵy respýblikalyq onomastika komissiiasynyń otyrysy ótti. Otyrysta jańa oblystardyń ataýy maquldandy, - dep habarlaidy "Ult aqparat" Mádeniet jáne sport ministrliginiń baspasóz qyzmetine silteme jasap.
Vedomstvo málimetinshe, is-sharaǵa komissiia músheleri, onyń ishinde Senat depýtaty Murat Baqtiiaruly, Májilis depýtaty Málik Qulshar, ǵylymi jáne saraptamalyq qoǵamdastyq ókilderi qatysty.
Komissiia otyrysy aiasynda Shyǵys Qazaqstan, Qaraǵandy jáne Almaty oblystary ákimdikteriniń jańadan qurylǵan Abai, Ulytaý jáne Jetisý oblystaryna ataýlar berý týraly usynystary qaraldy. Sondai-aq, memleket menshigindegi jekelegen nysandardy, sondai-aq Nur-Sultan, Almaty, Aqtóbe, Qaraǵandy, Qyzylorda, Qostanai, Pavlodar qalalaryndaǵy kóshelerdi qaita ataý máseleleri qaraldy.
"Ózderińiz biletindei, Memleket basshysy Qazaqstan halqyna Joldaýynda birqatar ákimshilik-aýmaqtyq ózgeristerdi atap ótti. Olardyń barlyǵy tereń ekonomikalyq negizdemege ie, orasan zor mýltiplikativtik áseri bar. Degenmen eń bastysy-qoǵamdyq pikirdi eskerý mańyzdy. Endi Qazaqstanda óz oblys ortalyqtary bar jańa oblystar paida bolady. Atap aitqanda, Semei qalasy jańa Abai oblysynyń ortalyǵyna, Jezqazǵan jańadan qurylǵan Ulytaý oblysynyń ortalyǵyna ainalady, osyndai ózgerister Almaty oblysyna da qatysty", - dedi ministr.
Kez kelgen qalany, eldi mekendi nemese kósheni qaita ataý onomastika salasyn retteitin zańnama talaptaryna sáikes júzege asyrylatynyn atap ótý qajet. Komissiia kelip túsken usynystardy qaraidy jáne qorytyndy beredi. Oń qorytyndy bolǵan kezde qaita ataý týraly sheshim Qazaqstan Respýblikasy Prezidentiniń Jarlyǵymen bekitiledi.
Otyrys qorytyndysy boiynsha komissiia músheleri ákimdikterdiń usynysyn maquldady. Jaqyn arada komissiianyń qorytyndysy daiyndalyp, zańnamaǵa sáikes odan ári jumys isteý úshin oblystardyń ákimdikterine jiberiletin bolady. Buǵan deiin respýblikalyq onomastika komissiiasy Qapshaǵai qalasyn Qonaev dep qaita ataý týraly oń qorytyndy bergen bolatyn.
