Onlain oqý – aýyl jastary úshin jańa múmkindik. Bul týraly búgin elordada ótken Aýyl jastarynyń II respýblikalyq forýmynda qazaq tili men ádebieti pániniń muǵalimi, volonter Arai Qarataeva aitty, dep habarlaidy QazAqparat.
«Biz Táýelsizdikpen birge ósip-óngen jastarmyz. Memleket tarapynan jastarǵa qoldaý kórsetilip, jeke damýyna jaǵdai jasalsa eken. Jastardyń ózi oqyǵan mamandyǵy boiynsha tabys kózi az, sondyqtan mamandyǵy boiynsha jumys istegisi kelmeidi. Tipti mamandyq boiynsha jumysqa turǵysy kelse de jumys ótili bolýyn talap etedi, al oqýdy endi ǵana bitirgen jasta jumys ótili qaidan bolsyn? Osy oraida jastar tarapynan usynys: aýyl sharýashylyǵy mamandarynyń aýylǵa baryp jumys isteitin baǵdarlamasy ázirlense deimiz», - deidi «Aýyl» partiiasy jastar qanatynyń múshesi Aman Ámirhanov.
«Aýyl» partiiasy Qaraǵandy oblysy boiynsha óńirlik filialynyń jastar qanatynyń belsendisi, qazaq tili men ádebieti pániniń muǵalimi Arai Qarataeva onlain oqý – aýyl jastary úshin jańa múmkindik ekenin aitty.
«Karantin kezinde egde jastaǵy ustazdar úshin jańa tehnologiialardy qoldaný qiyn boldy. Ýaqyt óte kele úirendi. Qalada oqityndar úshin qiyndyq bolǵan joq, sebebi qalada internet jelisi jaqsy jumys isteidi. Qalada oqityn oqýshylardyń 90%-y qosymsha bilimge júginedi, al aýylda ondai múmkindik joq. Qaraǵandy oblysy jastary osyndai máseleni sheshý úshin jalpyulttyq jobany qolǵa aldyq. Maqsatymyz – aýyldaǵy oqýshylardy kompiýterlik saýattylyqqa, aǵylshyn tilinde jaqsy sóileýge úiretý jáne UBT-ǵa daiyndaý. Osy tájiribede onlain oqytýdyń tiimdiligin baiqadyq. Osy joba boiynsha oblysymyzda 93 volonter oqytýshy jumys istep jatyr. 743 aýyl oqýshysy osy jobada júieli túrde bilim alýda. Onlain oqytýdy paidalanyp aýyl jastarynyń bilim sapasyn kóterýge bolady», - deidi ol.
