Foto: ashyq derekkóz
Qarjylyq monitoring agenttigi zańsyz oiyn biznesimen kúresti kúsheitti, dep habarlaidy Ult.kz.
Sońǵy eki jarym jylda 205 jasyryn kazino jabylyp, 224 adam qylmystyq jaýapqa tartyldy. Qazir negizgi qaýip – shetelde tirkelgen onlain-kazinolar.
Jyl basynan beri olardyń «ainasy» bolyp tabylatyn 17 myńnan astam silteme buǵattaldy. Alaida keibir qazaqstandyq tólem uiymdary áli de zańsyz platformalarǵa qyzmet kórsetip otyr.
Agenttik dereginshe, onlain-kazinony jarnamalaǵan 34 bloger anyqtalǵan. Olardyń ishinde Qaisar Qamza, Shyńǵyshan Kópbaev («Baller»), Táýirjan Aitmahanov, Nail Turǵanov, Diliara Amanqosqyzy jáne basqa da tanymal kontent jasaýshylar bar.
Kópshiligi zańdy bir rettik emes, júieli túrde buzady. Máselen, hip-hop oryndaýshy «Baller» (shyn aty – Shyńǵyshan Kópbaev) jyl basynan beri atalǵan bap boiynsha bes ret jaýapqa tartyldy.
600 myńnan astam jazylýshysy bar mýzykant-bloger Rinat Shamshyraqqa qatysty da onlain-kazino jarnamalaǵany úshin ákimshilik is qozǵalǵan.
Sonymen qatar bloger «Niko_nett» pen infliýenser Qaisar Qamza da erekshe nazarda. Sońǵysy óziniń telegram-arnasynda zańsyz oiyndardy únemi nasihattap, jalǵan jeńimpazdardyń videolaryn jariialap keledi.
Sol siiaqty, Nail Turǵanov onlain-kazino jarnamasy úshin 8 mln teńgeden astam qarjy alǵan.
Al Nurǵazy Toqtarov («Nakonay Qarapaiym») áleýmettik jelilerinde azamattardy zańsyz oiyndarǵa tartý maqsatynda agressivti naýqan júrgizip, jarnama úshin 15,8 mln teńge alyp, onyń jartysyna jýyǵyn sol platformalardyń ózinde oinap utylyp qalǵan.
Ókinishke qarai, bul iste qyzdar da belsendi. Máselen, Mariiam Quljabaeva («@oomariko») internet-kazinoda tirkelýge shaqyrǵan qarapaiym storisterin nebary 350 myń teńgege baǵalaǵan. Al onyń qurbany bolǵan otbasylar milliondaǵan qarjysynan aiyrylyp jatyr.
Oǵan qosa, Zýhra Hakieva, Diana Halmetova, Ásem Aýbakirova, Arina Baikova, Kúmisai Aiymbetova jáne basqa da blogerlerdiń aty belgili.
Agenttik endi mundai áreketterdi QR QK-niń 28-baby boiynsha «zańsyz oiyn biznesine kómektesý» retinde qarastyryp, qylmystyq jaýapkershilik engizýdi josparlap otyr.
Blogerlerge zańdy saqtap, qaýipti jarnamadan bas tartý týraly resmi eskertý jasaldy.
