QR Premer-Ministriniń orynbasary Roman Skliardyń jetekeshiligimen Túrkistan oblysynyń aýyl sharýashylyǵy taýarlaryn óndirýshilerdi qoldaý máselesine qatysty selektorlyq jiyn ótti. Óńirlerdiń ákimdikterine Túrkistan oblysyndaǵy qyryqqabatty jappai satyp alý týraly tapsyrma berildi, dep habarlaidy "Ult aqparat" primeminister.kz-ke silteme jasap.
Otyrys qorytyndysy boiynsha Úkimet rezervinen zardap shekken fermerlerge ekinshi kóktemgi egis jumystary úshin 1,6 mlrd teńge nesie bólý týraly sheshim qabyldandy.
Sondai-aq oblystardyń, Nur-Sultan jáne Almaty qalalarynyń ákimdikterine áleýmettik-kásipkerlik korporatsiialar esebinen qarajatty Túrkistan oblysynyń fermerlerinen erte pisetin qyryqqabatty satyp alýǵa jumsaý týraly tapsyrma berildi.
Esterińizge sala ketsek, Túrkistan oblysynda 10 sáýirde bastalǵan erte pisetin qyryqqabatty jinaý naýqany mamyr boiy jalǵasady. Fermerler egisten 300 myń tonna kóleminde ónim alýdy josparlap otyr.
Tótenshe jaǵdai kezeńinde aýylsharýashylyǵy taýarlaryn óndirýshiler óz ónimderin ótkizýde birqatar problemalarǵa tap boldy. Olar qyryqqabat ónimderin TMD elderine jóneltýdi josparlaǵan edi, alaida, dúkender men bazarlardyń jabylýyna bailanysty, atalmysh ónimge degen suranys azaidy.
Osyǵan orai, Premer-Ministr Asqar Mamin zardap shekken fermerlerge qoldaý kórsetýdi tapsyrdy.
30 sáýirde Túrkistan oblysynyń ákimi Ómirzaq Shókeev Úkimetten óńirdegi sharýalardyń qyryqqabatyn ótkizip berýge kómek surady. Onyń aitýynsha aimaqta qazir satylmai jatqan 250 myń tonna qyryqqabat bar. Al Aýylsharýashylyq ministrliginiń málimdeýinshe, shet elde qazaqstandyq qyryqqabatqa degen suranys tómendep ketken.
