Vaktsinalaý naýqany bastalǵannan beri «SQ-Farmatsiia» biryńǵai distribiýteri óńirlerge 4,4 mln doza ekpe jetkizgen, dep habarlaidy QazAqparat.
Bul týraly kompaniianyń basqarma tóraǵasy Erhat Esqaliev ortalyq kommýnikatsiialar qyzmetinde ótken brifingide aitty.
«SQ-Farmatsiia» JShS biryńǵai distribiýtor retinde tegin meditsinalyq kómektiń kepildendirilgen kólemi men mindetti meditsinalyq áleýmettik saqtandyrý júiesi sheńberinde meditsinalyq uiymdar men respýblika halqyn dárilik zattarmen qamtamasyz etip otyr. 2020 jyldyń 1 qańtarynan bastap MÁMS engizilýimen 700 myńǵa jýyq saqtandyrylǵan halyq ambýlatoriialyq deńgeide tegin dári-dármek aldy», - dedi «SQ-Farmatsiia» basshysy.
Sondai-aq, koronavirýsqa qarsy vaktsinanyń tórt túrin tańdaý múmkindigi bar ekenin eske saldy.
«Spýtnik V» vaktsinasynyń 10 million 280 myń dozasy satyp alyndy, Onyń ishinde aǵymdaǵy jyldyń 1 aqpanynan bastap óńirlerge birinshi komponenttiń 1,9 mln dozasy jáne ekinshi komponenttiń 14 mln. dozasy jóneltildi. 10 maýsymǵa deiin birinshi komponenttiń 1 mln 200 myń dozasyn jáne ekinshi komponenttiń 525 myń dozasyn jóneltý aiaqtalady», - degen Erhat Esqaliev QazVac vaktsinasynyń 2 mln dozasyn satyp alǵanyn aitty.
«Óńirlerge otandyq vaktsinanyń 100 myń dozasy jetkizildi. Kelesi jetkizilim maýsym aiynyń sońyna deiin josparlanǵan. Hayat-Vax-tyń 1 mln dozasy satyp alyndy jáne óńirlerge jóneltildi. Budan basqa, Sinovac Biotech kompaniiasy óndiretin Coronavac vaktsinasynyń 500 myń dozasy satyp alyndy. Óńirlerge 12 maýsymnan keiin jóneltiledi», - dedi biryńǵai distribiýter basshysy.
Erhat Esqalievtiń málimetinshe, búgingi tańda óńirlerge COVID-19 vaktsinasynyń 4 mln 400 dozasy jetkizilgen.
«Vaktsinalardy aimaqtarǵa bólý Densaýlyq saqtaý ministrligi sanitarlyq-epidemiologiialyq baqylaý komitetiniń tapsyrysy boiynsha júzege asyrylady», - dedi «SQ-Farmatsiia» basshysy.
