Óńirlerdiń biýdjet derbestigin nyǵaitý úshin qosymsha salyq túsimderi ákimdikterge beriledi. Bul týraly Parlament palatalarynyń birlesken otyrysynda 2021 jylǵy respýblikalyq biýdjettiń atqarylýy týraly esepti qaraý kezinde Premer-Ministrdiń orynbasary–Qarjy ministri Erulan Jamaýbaev málim etti, dep habarlaidy QazAqparat.
«Biýdjettiń shikizattyq sektordan táýeldiligine jáne salyq salasyndaǵy ákimshilendirýge qatysty syn-pikirler aityldy. Sońǵy 5 jyldaǵy salyq túsimderiniń jalpy kólemindegi shikizattyq emes sektordyń úlesi ortasha alǵanda 68 % qurady. Osy jyldar ishinde shikizattyq sektordyń úlesi 32%-ten asqan joq. Degenmen, jahandyq ekonomikanyń birtindep jandanýy negizgi eksporttyq pozitsiialarǵa baǵanyń ósýine alyp keldi. Bul shikizattyq sektordan túsetin túsimderdi ulǵaitýǵa múmkindik berdi. Máselen, jer qoinaýyn paidalanýshylarǵa salyq boiynsha tekserýler men gorizontaldy monitoring nátijesinde biýdjetke qosymsha 200 mlrd teńgeden astam qarajat óndirip alyndy», - dedi Jamaýbaev.
Onyń aitýynsha, Úkimet salyq bazasyn keńeitý, iaǵni biznesti damytý jáne olardy kóleńkeden shyǵarý, salyq ári jáne kedendik ákimshilendirýdi jetildirý, memlekettik kásiporyndardy jekeshelendirý jáne basqa da kózder arqyly biýdjet kiristerin ártaraptandyrýǵa arnalǵan is-sharalardy júieli túrde júrgizetin bolady. Máselen, sońǵy 3 jyldyń ózinde salyqtyq jáne kedendik ákimshilendirý men tsifrlandyrýdan biýdjetke 2 trln teńgeden astam qosymsha túsimder qamtamasyz etilgen. Onyń tek 680 mlrd teńgeden astamy byltyr túsken.
«Byltyr Qytai Halyq Respýblikasynyń eksporty – Qazaqstan Respýblikasynyń importy baǵyty boiynsha statistikalyq derekterdegi alshaqtyq 40,5 paiyzǵa tómendedi. Bul baǵyttaǵy jumys kúsheitiletin bolady», - dedi ministr.
Sonymen qatar Úkimet basshysynyń orynbasary biýdjet shyǵystaryna qatysty toqtaldy.
«Biz Esep komitetiniń respýblikalyq jáne jergilikti biýdjetter arasyndaǵy qarjy aǵyndaryn barynsha azaitý jónindegi usynysymen kelisemiz. Óńirlerdiń biýdjet derbestigin nyǵaitý úshin qosymsha salyq túsimderin ákimdikterge berý jolymen biýdjetaralyq qatynastardy reformalaý júzege asyrylatyn bolady», - dedi Jamaýbaev.
