Parlament Senatynyń jalpy otyrysynda «Qazaqstan Respýblikasynyń Sý kodeksine jergilikti ókildi, ortalyq jáne jergilikti atqarýshy organdar arasynda aýyzsýmen jabdyqtaýdy sýbsidiialaý jónindegi ókilettikterdiń arajigin ajyratý máseleleri boiynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaidy "Ult aqparat".
Zań jobasy Parlament depýtattarynyń bastamashylyǵymen ázirlendi. Onyń negizgi maqsaty - halyqty aýyzsýmen qamtamasyz etý úshin sýbsidiialardy bólý jáne óńirlerdiń ýaqytyly alýyna qol jetkizý.
«Búgingi kúni halyqty aýyzsýmen jabdyqtaý qyzmetteriniń qunyn tómendetý maqsatynda zańnamamen balamasyz kózderden aýyzsýdy sýbsidiialaý kózdelgen. Memleket aýyzsýdyń qunyn sýbsidiialaý bóliginde halyqqa kepildendirilgen qoldaý kórsetýde.
Ýákiletti organnyń málimetine sáikes, 2020 jyldyń qorytyndysy boiynsha aýyl halqynyń 87%-y ortalyqtandyrylǵan aýyzsýmen qamtyldy. Ortalyqtandyrylǵan aýyzsýmen qamtylǵan aýyldyq eldi mekenderdiń sany – 4078, solardyń ishinde 42%-y sýbsidiiaǵa qol jetkizgen. Qoldanystaǵy zańnamaǵa jasalǵan taldaý sýmen jabdyqtaý obektilerin ýákiletti organ bekitetin tizbege engizý protsesi kóptegen vedomstvoaralyq kelisýlerdi talap etetinin kórsetip otyr. Ókinishke qarai, atalǵan kelisýlerdiń 1-2 jylǵa deiin sozylyp ketýi osynyń dáleli», - dedi senator Nariman Tóreǵaliev.
Osyǵan bailanysty, zań jobasymen aýyzsýdy sýbsidiialaý úshin tizbeni bekitý kezinde ókilettikterdiń arajigin naqty ajyratý usynylyp otyr.
Birinshiden, aýyzsýmen jabdyqtaýdyń jergilikti júieleri jergilikti atqarýshy organdar deńgeiine beriletin bolady, al toptyq júieler burynǵydai ýákiletti organnyń qaraýynda qalady.
Ekinshiden, jergilikti ókildi organdardyń ózine óńirdiń sýmen jabdyqtaý boiynsha kórsetiletin qyzmetterdiń tarifterine bailanysty aýyz sýdyń 1 tekshe metri úshin tólem mólsherin bekitýge ókilettilik beriledi.
«Mysaly, máslihat respýblika boiynsha eń tómengi tariften tómen emes jáne oblystyń áleýmettik-ekonomikalyq damýyn eskere otyryp, ortasha oblystyq deńgeiden joǵary emes tólemder mólsherin bekite alady. Jalpy alǵanda, osy zań jobasynyń normalary jergilikti atqarýshy organdardyń derbestigi men jaýapkershiligin arttyrýǵa, halyqty aýyzsýmen qamtamasyz etý úshin óńirlerdiń sýbsidiiany ýaqytyly alýyna yqpal etetin bolady», - dedi depýtat.
Senat tóraǵasy Máýlen Áshimbaev aýyldyq eldi mekenderdi sapaly aýyzsýmen qamtamasyz etý elimizdiń aldynda turǵan basty mindetterdiń biri ekenin atap ótti.
«Depýtattar bastamashylyq jasaǵan osy zań aýyldyq jerlerdi sýmen jabdyqtaý máselelerin sheshý jolyndaǵy mańyzdy qadam ekeni sózsiz. Usynylyp otyrǵan normalar óńirlerdi damytýǵa jáne jergilikti atqarýshy organdardyń jumysynyń tiimdiligin arttyrýǵa yqpal etetini aiqyn», - dep atap ótti M. Áshimbaev.
