Prezident Ákimshiliginiń basshysy Áset Isekeshevtiń tóraǵalyǵymen Elbasy tapsyrmalarynyń tiimdi ári sapaly atqarylýyn qamtamasyz etý, memlekettik baǵdarlamalar men reformalardy júzege asyrý máseleleri jóninde keńes ótti, dep habarlaidy "Ult aqparat" Aqordaǵa silteme jasap.
Prezident Ákimshiliginiń Basshysy Áset Isekeshev Prezidenttiń Qazaqstan halqyna Joldaýynda aitqan mindetterin, memlekettik baǵdarlamalardy, «100 naqty qadam» Ult josparyn odan ári júzege asyrý maqsatymen naqty nátijege qol jetkizýge baǵyttalǵan baqylaý jáne monitoring júrgizý júiesiniń engiziletinin málimdedi. Bul rette, Á.Isekeshev memlekettik organdardyń qyzmeti, Qazaqstan Prezidenti birneshe ret atap kórsetkendei, halyqtyń ál-aýqaty men tabysyn arttyryp, turmys sapasyn jaqsartýǵa baǵyttalýy tiis.
«Turaqty júrgizilgen áleýmettik zertteýler men taldaýlar negizinde Óńirlerdegi ózekti infraqurylymdyq jáne áleýmettik máselelerdiń kartasy ázirlendi. Bul qujat ári qarai jumys isteý úshin Úkimet pen ákimderge joldandy», - dedi Prezident Ákimshiliginiń basshysy.
Basqosýda memlekettik organdardyń ashyqtyǵy jáne halyqpen tyǵyz qarym-qatynasy onyń tiimdi qyzmetiniń mańyzdy sharty sanalatyny atap ótildi. Osyǵan orai, óńirlerde ákimderdiń jyl saiynǵy esep berý kezdesýleriniń ornyna barlyq aýdandaǵy turǵyndarmen turaqty kezdesý ótkizýdi, sonyń ishinde azamattardy jeke qabyldaýdy uiymdastyrýdy kózdeitin jańa jumys formaty qabyldandy. Sondai-aq, barlyq aýdandyq jáne qalalyq ákimdikterde halyqpen tikelei qarym-qatynas jasaý jáne keri bailanys ornatý júiesi engiziledi.
Bul azamattardyń mańyzdy máselelerin jedel sheship, óńirlerden shynaiy aqparat alýǵa múmkindik beredi. Osy jumystar Elbasy usynǵan «Halyqqa kómek» jobasy aiasynda «Nur Otan» partiiasymen birlesip júrgiziletin bolady.
Á.Isekeshev Prezident Ákimshiligi budan bylai áleýmettik saiasatty tiimdi júrgizýge, zań ústemdigi men azamattardyń qaýipsizdigin qamtamasyz etýge, memlekettik qyzmetter sapasyn arttyrýǵa, sybailas jemqorlyqpen kúresýge, óńirlik infraqurylym sapasyn jaqsartýǵa, sonyń ishinde «Qutty meken» jáne «Aýyl - el besigi» jobalarynyń iske asyrylýyna, sondai-aq «Rýhani jańǵyrý» baǵdarlamasy aiasynda belsendi júzege asyrylatyn jobalarǵa basa nazar aýdarylatynyn aitty.
Sońynda Á.Isekeshev jergilikti jáne ortalyq memlekettik organdar basshylarynyń jumysyn baǵalaý printsipi ózgeretinin atap ótti. Osyǵan bailanysty reformalar men memlekettik baǵdarlamalardy júzege asyrýdyń tiimdiligine monitoring jáne baqylaý júrgizýdiń jańa júiesi engiziletin bolady. Bul máselelermen Prezidenttiń tapsyrmasyna sáikes, «Nur Otan» partiiasymen birlesip qurylatyn Tiimdilikti baǵalaý jáne monitoring ortalyǵy ainalysady.
Jiyn qorytyndysy boiynsha, Prezident Ákimshiliginiń tiisti barlyq qurylymdyq bólimshelerine júktelgen mindetterdiń sapaly ári ýaqtyly oryndalýyn qamtamasyz etý tapsyryldy.
