Elbasy Almaty oblysynyń ákimi Amandyq Batalovtyń jumysyna joǵary baǵa berdi
Jyl basynda bári beiqam. Al jyl sońynda qarajatty ońdy-soldy shashý bastalady. Toi shattyǵyna shashylǵan táttiler bolsa, qaneki. Milliondaǵan memleket qarjysy – siz ben bizdiń salyǵymyzdan, investitsiianyń igiliginen quiylǵan túsim jyl sońynda igerildi degen qorytyndynyń qurbany bolady. Ásirese, qarasha men jeltoqsan ailarynda ministrlikter qarjy igerý úshin jantalasqa túsedi. Mundai jaýapsyzdyqty keshe Elbasy Nursultan NAZARBAEV Úkimettiń keńeitilgen májilisinde aityp, QR Qarjy ministrligine memleket qarjysyn baqylaýdy kúsheitýdi tapsyrdy.
QR Premer-Ministri Baqytjan Saǵyntaev ashyp bergen otyrysta Elbasy ministrler tarapyna birqatar syn-eskertpeler aitty.
Jiynda Shyǵys Qazaqstan oblysynyń ákimi Danial Ahmetov, Batys Qazaqstan oblysynyń ákimi Altai Kólginov, Qyzylorda oblysynyń ákimi Qyrymbek Kósherbaev baiandama jasady. Almaty oblysynyń basshysy Amandyq Batalov ta baiandama jasap, óńirde atqarylyp jatqan ońdy isterdi atap ótti.
Óńirde ótken jyly damýdyń joǵary qarqyny saqtaldy. Atap aitsaq, maqsatty indikatorlarǵa tolyǵymen qol jetti. Jalpy óńirlik ónimniń 2 paiyzdyq ósimi qamtamasyz etildi. Óz baiandamasynda oblys ákimi: «529 mlrd. teńge investitsiia tartyldy. Jergilikti biýdjet túsimi 3,4 paiyzǵa ósti. 25 myńnan astam jumys orny ashyldy, onyń 5 myńnan astamy «Nurly jol» baǵdarlamasy aiasynda quryldy. Osy baǵdarlama boiynsha 69 jobany júzege asyrýǵa bólingen 38,4 mlrd. teńge tolyq igerildi», – dep atap ótti.
Baiandamadan keiin Prezident Nursultan Nazarbaev Almaty oblysynyń ákimi Amandyq Batalovtyń jumysyn joǵary baǵalap, ózge áriptesterine úlgi etti. «Jumysyń jaqsy, oń baǵa beremin. Kóp áriptesteriń úirenetin jumys istep jatyrsyń. Tabysty bol», – dedi Elbasy.
Keńeitilgen otyrys ádettegidei Aqordada emes, Úkimet úiinde ótti. Jiynda eldiń 2016 jylǵy áleýmettik-ekonomikalyq damýynyń qorytyndylary qaralyp, 2017 jyldaǵy maqsat-mindetter aiqyndaldy.
Qýanysh TUNǴATAR
