Shyǵys Qazaqstan oblysy ákimdiginiń otyrysynda aimaqty damytýǵa qatysty birqatar mańyzdy máseleler qaraldy, dep habarlaidy "Ult aqparat" óńir basshysynyń baspasóz qyzmetine silteme jasap.
Naqty aitqanda, otyrysta agroónerkásip kesheni salasyndaǵy jańa jobalar talqylandy. ShQO-da aýyl sharýashylyǵy ónimderiniń óndirisi damyp keledi. Máselen, maily daqyldardy egetin alqaptar ulǵaiýda. Sebebi, fermerler Semeide jáne Glýbokoe aýdanynyń Predgornoe aýylynda eki iri mai ekstraktsiialyq zaýyty bar ekenin jáne ónimderin solarǵa ótkize alatyndaryn jaqsy biledi. Sondai-aq, salada jaiylymdyq jerlerge qatysty problema bar. Zańnamaǵa engizilgen keiingi ózgerister paidalanylmai jatqan jaiylymdyq jerlerdi qaitaryp alyp, shynaiy muqtaj sharýalarǵa usynýǵa múmkindik bermek. Aita ketý kerek, kóptegen kásipkerler igermeitin jerlerin óz erikterimen qaitaryp jatyr.
Ekinshi mańyzdy másele – mektepke deiingi bilim berý mekemelerine qoljetimdilikti qamtamasyz etý. ShQO – 3 jastan 6 jasqa deiingi balalardyń balabaqshaǵa barý kezegi tolyǵymen joiylǵan elimizdegi jalǵyz aimaq.
Biraq, Óskemen men Semeide kishkentai búldirshinderge arnalǵan bóbekjaiǵa áli de kezek kútip júrgender bar.
«Bizge kishkentai búldirshinderdi qabyldaityn bóbekjailardyń máselesimen jaqsylap ainalysý kerek. Aldaǵy 10 kúnde barlyq qalalar men aýdandardyń ákimderi jospar daiyndap, qajettilikti zertteidi. Kelesi jyly memlekettik jekemenshik áriptestik aiasynda jańa nysandardyń qurylysyn bastap ketemiz», - dedi óńir basshysy.
Mektepterdiń jańa oqý jylyna daiyndyǵy týraly aitqan Danial Ahmetov, «19 tamyzǵa deiin oblystyń barlyq jalpy bilim beretin 647 mektebinde jóndeý jumystary aiaqtalatynyn» málim etti.
Qazir kabinetter men ashanalardy jańǵyrtý júrip jatyr. Bilim berý mekemeleriniń bárine beinebaqylaý men dabyl júieleri ornatylady.
Birinshi qyrkúiekke deiin barlyq mektep qajetti otyn qorymen qamtamasyz etiledi.
Oblys ákimi mektepten tys balalardy damytý, shyǵarmashylyqqa baýlý jumystaryn uiymdastyrý áli de jetkiliksiz dep esepteidi. Óitkeni, ShQO-da bar-joǵy 114 úiirme men sektsiia bar.
