Aimaqta indýstriialyq-innovatsiialyq damý memlekettik baǵdarlamasy qalai júzege asyrylýda, qysqy jylytý maýsymyna ázirlik qandai, oblystyq máslihat biyl qandai sharýalardy tyndyryp úlgerdi? Bul máseleler oblystyq máslihattyń selektorlyq rejimdegi kezekti VI sessiiasynda qaraldy. Sessiiaǵa oblys ákiminiń orynbasary Qýat Tumabaev qatysty.
Jobalardyń 75 paiyzy joǵary ónimdilikke ie
Alǵashqy másele boiynsha baiandama jasaǵan oblystyq kásipkerlik jáne indýstriialyq-innovatsiialyq damý basqarmasy basshysynyń mindetin atqarýshy Maqsat Músápirbekov 2015-2019 jyldarǵa arnalǵan baǵdarlamany júzege asyrýda tiisti basqarma men qala, aýdan ákimderi josparlanǵan sharýalardy atqaryp jatqandyǵyn málim etti.
Onyń sózinshe, aǵymdaǵy jyldyń jeti aiy ishinde negizgi kapitalǵa investitsiia kólemi 174,6 mlrd. teńgeni quraǵan. Bul ótken jyldyń sáikes merzimimen salystyrǵanda 19,7 paiyzǵa kem. Basty sebep - Aiagóz aýdanyndaǵy «KAZ Minerals Aktogai» Qazaqmys korporatsiiasynyń Aqtoǵai KBK qurylysyna salymdardy azaitýy. Sondai-aq, aǵymdaǵy jyldyń sońyna deiin Indýstriialandyrý kartasynyń jobalary jáne ónerkásiptik kásiporyndar investitsiialary esebinen investitsiialar kóleminiń ósimi kútilýde.
Búgingi ýaqytta oblystyń Indýstriialandyrý kartasyna 19 myń jumys ornyn qurýmen 1 trillion 159,9 mln. teńgeni quraityn 82 joba qosylǵan. Olardyń 75 paiyzy joǵary ónimdilik kórsetýde. Bul kórsetkish - óńirdiń investitsiialyq belsendiligine anyq dálel. Al jalpy Indýstriialandyrý kartasyn iske asyrý bastalǵaly beri 48 joba iske qosylsa, jeti myńnan astam jumys orny qurylǵan. Biyl 435 jumys ornyn qurýǵa múmkindik beretin jeti jobany iske qosý kózdelgen. Baiandamashy budan ózge qalalar men aýdandarda biyl iske qosylýy tiis iri jobalarǵa da toqtalyp ótti.
Sonymen birge, ol oblysta Ult josparyn iske asyrý aiasynda ótken qańtar aiynda HQKO janynan investorlarǵa qyzmet kórsetý sektory qurylǵanyn da atap ótti. Iaǵni, investorlar endi barlyq memlekettik qyzmetterdi «bir tereze» qaǵidaty boiynsha avtomattandyrylǵan júiede ala almaq. Qoryta aitqanda, bizdiń óńir investorlar úshin asa qolaily sanalýda jáne bizdiń taraptan olardy tartýǵa barlyq múmkindikter jasalyp otyr. Bul maqsatta oblys ákiminiń bastamasymen óńirlik keńes te qurylǵan.
Oblystyq máslihattyń depýtaty Bolat Nurasyl baiandamada aitylǵandardy áriptesteri quptaitynyn aita kele, keleshekte iri jobalarmen qatar, aýdan-qalalardaǵy qarjylai qoldaýǵa muqtaj shaǵyn jobalardy da eskerýdi usyndy.
Sailaýshylarmen tyǵyz bailanysta jumys isteidi
Oblystyq máslihattyń hatshysy Vladimir Golovatiýk biyl atqarǵan jumystarynyń esebin berdi. Osymen altynshy ret shaqyrylyp otyrǵan oblystyq depýtattyq korpýs 2016 jyldyń naýryz aiynan beri jumys istep keledi. Óńirdiń barlyq máseleleri depýtattar nazarynan tys qalǵan emes, olar sailaýshylarmen tyǵyz bailanysta bolyp, qajetti aqparattardy berip otyrady. Máselen, aǵymdaǵy jyldyń alty aiynda 393 kezdesý ótkizip, 1659 adamdy jeke máselelerimen qabyldaǵan. Sailaýshylardy tolǵandyrǵan ózekti máseleler boiynsha ártúrli organdarǵa 146 saýal joldansa, 17 másele boiynsha aryz ielerine túsinik berilip, 412 másele oń sheshimin tapqan. Olardyń 50-den astamy materialdyq jáne qarjylai kómek kórsetý arqyly sheshilgen. Basqa da 149 másele depýtattar nazarynda tur.
Máslihat hatshysynyń aitýynsha, máslihat janynda «Nur Otan» partiiasynyń depýtattyq fraktsiiasy jumys isteidi. Partiia múshesi bolyp tabylatyn depýtattar qoǵamdyq qabyldaýǵa da belsene aralasady. Memleket basshysynyń reformalyq saiasatyn ustanýshylar ári belsendi júrgizýshiler bolyp tabylatyn olar az qamtylǵan otbasylarǵa, mektepterge, balabaqshalarǵa, zeinetkerlerge, túrli sharalardy ótkizýge materialdyq kómek berýden de tys qalǵan emes.
Jylytý maýsymyna daiyndyq aiaqtalyp keledi
Aimaqtyń qysqy jylytý maýsymyna daiyndyǵy boiynsha esep bergen oblystyq energetika jáne turǵyn úi-kommýnaldyq sharýashylyq basqarmasy basshysynyń mindetin atqarýshy Rinat Omarov daiyndyq belgilengen kestege sai júrip jatqanyn atady.
Bekitilgen kestege sáikes biyl JEO-da qazandyqtardy daiyndaý 90, týrboagregattardy ázirleý 98 paiyzdy quraidy. Sondai-aq, SES-ta 23 gidroagregatty jóndeý qajet bolsa, onyń 20-sy jóndelgen, bul - 88 paiyz kórsetkish.
Baiandamashynyń aitýynsha, qazirgi ýaqytta elektrmen qamtý nysandary daiyndyǵynyń ortasha kórsetkishi - 98 paiyz. Al bilim berý, densaýlyq saqtaý, áleýmettik qorǵaý nysandary, turǵyn úiler qysqa tolyqtai daiyn. Semei qalasynda «Jylýkommýnenergo» MKK menshik qarajaty esebinen 249,8 mln. teńgeniń jóndeý jumystaryn júrgizse, «Nurly jol» baǵdarlamasynyń aiasynda 2015 jyldan bastap Semei qalasyn jylýmen qamtý nysandaryn damytý boiynsha 10 joba júzege asyrylýda. Qazir tórt joba aiaqtalǵan. Áleýmettik qorǵaý nysandaryna qajetti kómir qory tolyq jetkizilip, bilim men densaýlyq saqtaý salasyna qajetti qatty otynnyń alǵashqy bólikteri tasylǵan. Aldaǵy jylytý maýsymyn oidaǵydai ótkerýdi múltiksiz baqylaýǵa alý jáne ótkizýdi úilestirý basqarma basshylyǵyna jáne qala-aýdan ákimderine tapsyryldy.
Oblystyq ekonomika jáne biýdjettik josparlaý basqarmasynyń basshysy Almashan Smatlaev ártúrli máseleler boiynsha baiandama jasasa, depýtat, D.Serikbaev atyndaǵy ShQMTÝ rektory Jasulan Shaimardanov jinalǵandar aldynda oblys mektepterin bitirgen túlekterdiń nelikten kórshiles, atap aitqanda, Resei Federatsiiasynyń shekaralas oblystaryndaǵy joǵary oqý oryndaryn tańdaityndyǵyna aýqymdy taldaý jasady. Esterińizde bolsa, ol oblys ákiminiń tapsyrmasyna sáikes atalǵan másele boiynsha qurylǵan jumys tobyna jetekshilik etýde.
Sondai-aq, sessiiada buǵan deiin birneshe shaqyrylym depýtaty bolǵan Nurjan Túsipova «Qazaqstannyń Qurmetti depýtaty» atanyp, arnaiy tósbelgimen marapattaldy. Qurmetti ataqty máslihat hatshysy Vladimir Golovotiýk saltanatty jaǵdaida tabystap, burynǵy áriptesteri quttyqtaýlaryn bildirdi.
Sessiiada qaralǵan barlyq máseleler boiynsha tiisti sheshim qabyldandy.
Dáýren Allabergenuly, "Didar" gazeti
