Búgin Almaty jáne Jambyl oblystary saýda-ekonomikalyq, ǵylymi-tehnikalyq, gýmanitarlyq jáne ózge de salalar boiynsha ózara yntymaqtastyq memorandýmyna qol qoidy. Bul kelisimge Almaty oblysynyń ákimi Amandyq Batalovtyń shaqyrýymen kelgen Jambyl oblysynyń ákimi Kárim Kókrekbaev bastaǵan oblys delegatsiiasynyń Almaty oblysyna jasaǵan jumys sapary barysynda qol jetkizildi. Jumys saparynyń basty maqsatynyń biri – Jetisý óńirinde qant qyzylshasyn jandandyrýdaǵy oblystyń sátti júzege asyryp jatqan tyń tehnologiialarymen tanysý bolyp tabyldy. Bul týraly oblys ákiminiń baspasóz qyzmeti habarlady.
Birinshi kezekte Jambyl oblysynan kelgen delegatsiia Kóksý aýdanyndaǵy «Alim-Taiar» sharýa qojalyǵynyń qant qyzylshasy alqabyna at basyn burdy.
Bul sharýa qojalyǵy qant qyzylshasy, piiaz, maiburshaq jáne baqshalyq kókónisterdi ósirýmen ainalysady. Ótken jyly 53 ga alqapqa qant qyzylshasyn egip, odan gektarynan ortasha eseppen 350 tsentnerden ónim alǵan bolsa, aǵymdaǵy jyly qyzylsha alqabynyń kólemin 60 gektarǵa deiin arttyryp otyr. Aǵymdaǵy jyly egilgen tátti túbirdiń ár gektarynan ortasha eseppen 600 tsentnerden, jalpy salmaǵy 3600 tonna qant qyzylshasyn jinaýdy kózdeýde.
Sharýa qojalyǵynyń basshysy Taiar Zeinalovtyń aitýynsha qant qyzylshasyn ósirý - búgingi kúni qaita tiimdi iske ainaldy. Bul úlken eńbekti talap etedi, alaida dál qazirgidei memleket tarapynan kórsetilip jatqan jan-jaqty qoldaýdyń arqasynda onyń óteýi kóńilden shyǵady. Eń bastysy qalaǵan ýaqytta ótkizetin ónimińdi qabyldaityn qant zaýyttary bar.
Sharýashylyq qojaiynyń sózinen keiin delegatsiia músheleri Kóksý qant zaýytymen tanysýǵa attandy. Qazir munda zaýytty jańǵyrtýdyń ekinshi kezeńi júrgizilip jatyr. Iske asyrylyp jatqan jumystar jaiynda sóz qozǵaǵan kásiporyn basshysy Altynbek Abatov:
-Aǵymdaǵy jyly quny 1 mlrd. teńgege Kóksý qant zaýytyn modernizatsiialaýdyń ekinshi kezeńin júrgizip jatyrmyz. Zaýytqa búginde qajetti qural-jabdyqtar jetkizildi. Sondai-aq ákteý-kúidirý peshin, jylý elektrtsentralyn tolyqtai avtomattandyrýdy, jyldam jylytqysh qurylǵylaryn ornatýdy jáne «Grimme» firmasynyń úimeleýshi tehnikasyn satyp alýdy josparlap otyrmyz. Atqarylyp jatqan jumystardyń arqasynda aǵymdaǵy jyly 220 myń tonnaǵa deiin qant qyzylshasyn óńdep, odan 25 myń tonna daiyn qant alýdy kózdeýdemiz.
Oblys ákimi Amandyq Batalov ótken jyly zaýyttyń 220 myń tonna qant qyzylshasyn qabyldap, odan 22 myń tonna taza qant óndirgendigin jáne biyldan bastap oblysta Aqsý qant zaýytyn qalpyna keltirý jumystary joǵary qarqynmen júrgizilip jatqandyǵyn atap ótti.
- Elbasynyń Jetisý ólkesine qant qyzylshasynyń ósirýshi óńir ataǵyn qaita jańǵyrtý týraly tapsyrmasyn iske asyrý maqsatynda oblysta keshendi jumystar atqaryldy. Qazirgi kúni tuqym men tyńaitqyshtardy satyp alýdan bastap, shyqqan ónimdi óńdeýge jiberýge deiingi barlyq máseleler jan-jaqty taldanyp, bir júiege keltirildi. Qazir biz keleshekke jumys isteýdemiz. Iaǵni Aqsý qant zaýytyn iske qosqaly jatyrmyz. Keleshekte Alfkól aýdanynda oblysymyz boiynsha úshinshi qant zaýytyn iske qosý josparymyz da bar. Bunyń barlyǵy sharýalarǵa jaily jaǵdai týyndatatyndyǵy belgili, onyń ústine jyl saiyn tátti túbir óndirýshilerdiń sany artyp keledi. Eger bas kezinde bul baǵytta 120 sharýa qojalyǵy ainalysqan bolsa, qazirgi kúni olardyń sany 250 jetti, - dedi A.Batalov.
Sondai-aq áleýmettik, mádeni jáne ónerkásiptik nysandar da delegatsiianyń nazarynan tys qalmady. Atap aitar bolsaq, qaladaǵy Oqýshylar saraiy, Jastarǵa qyzmet kórsetý ortalyǵy, «Jastar» parki, Qaratal ózeniniń jaǵalaýy, qaladaǵy ortalyq basseinimen tanysty. Qalanyń Ońtústik-batysynda oryn tepken «Taldyqorǵan» indýstraldy aimaǵy da qonaqtardyń erekshe yqylasyna bólendi. Jaqyn bolashaqta bul aimaq qalanyń iri ónerkásiptik alańy bolmaq.
Jambyl oblysynyń ákimi Kárim Kókrekbaev atap ótkendei, qaladaǵy árbir nysan óz aldyna ereksheligimen jáne qaitalanbas sáýletimen kózge túsedi. Úirenetin jáne úlgi alarlyq jobalar da barshylyq.
-Taldyqorǵan zamanaýi ári óte ádemi qala! Qalaǵa kire beristen bastap árbir ǵimarat, árbir nysan shynaiy peiilmen, jan dúniesin sala otyryp oryndalǵan. usaq tetikterine deiin egjei-tegjei qarastyrylǵan. Bul ásirese qalanyń kóshelerinde ornatylǵan zamanaýi elektr qýatyn únemdeitin jaryqdiodty kóshe shamdarynan, qalanyń kógaldandyrylýynan erekshe baiqalady. Qalanyń kóshelerine sapaly jol tósemderi jaiylǵandyǵy bári kózge birden túsedi. Paidalanýǵa berilip jatqan árbir nysan turǵyndardyń jaily ómir súrýine yńǵailastyrylyp, uzaq jyldarǵa sapaly salynǵandyǵy qýantady. Qala turǵyndarynyń atqarylyp jatqan iske kóńilderi tolady degen senimdemin. Qaratal ózeniniń jaǵalaýyn abattandyrý jáne «Jastar» parkiniń jobasy bizdi qatty qyzyqtyrdy. Úlgi retinde almaq oiymyz bar. Osy tiptegi jaǵalaýdy Taraz qalasyndaǵy Talas ózeniniń boiynda da salmaq oidamyz, - dedi Jambyl oblysynyń ákimi.
Osydan keiin oblystyq ákimdiktiń májilis zalynda aldaǵy ýaqyttaǵy qos oblystyń yntymaqtastyq máseleleri talqylandy.
Almaty oblysynyń ekonomikalyq damý kórsetkishterin atap ótken Amandyq Batalov:
-Memleket basshysy Nursultan Ábishuly Nazarbaevtyń bergen mańyzdy tapsyrmalarynyń biri óńiraralyq yntymaqtastyqty damytý bolyp tabylady. Osy maqsatta biz Jambyl oblysymen yntymaqtastyǵymyzdy damytqymyz keledi. Ár óńirdegi jaqsy isti úlgi etip, óz oblysyńnyń aýmaǵynda júzege asyrý arqyly qarqyndy damýǵa múmkindik týady. Jambyl oblysy – óndiristik óńir, al Almaty oblysy – agrarlyq óńir. Sol sebepti ár oblysqa bir-birimizden alarymyz da, úirenerimiz de mol. Bul áriptestigimiz aldaǵy ýaqytta eki oblystyń barlyq salalar boiynsha damýyna óziniń úlken septigin tigizetindigine senimdimin, - dep atap ótti Amandyq Ǵabbasuly.
Óz tarapynan Jambyl oblysynyń ákimi Kárim Kókrekbaev ta oblystyń ekonomikalyq damý áleýetimen tanystyryp, Jetisý jerine jasaǵan jumys saparynyń nátijeli bolǵandyǵyn, bul kezdesýdiń oblystardyń damýyna, sonyń ishinde qant qyzylshasy salasyn damytýda oń yqpalyn tigizetindigine senim bildirdi.
Kezdesý sońynda qos tarapqa da tiimdi damý josparlaryn ekijaqty yntymaqtastyq memorandýmymen bekitti. Oblystar saýda-ekonomikalyq, ǵylymi-tehnikalyq, gýmanitarlyq jáne ózge de salalar boiynsha ózara yntymaqtastyǵyn ári qarai damytatyn bolady.
