«Adal eńbekpen mal izdemek – ol arly adamnyń isi» dep dana Abai aitqandai rasynda da, adamzat paida bolǵannan beri óziniń qajettiligin tek eńbek arqyly qamtamasyz etip keledi. Eńbek adamdy adaldyq, tabandylyq, jaýapkershilik siiaqty qasietterge baýlyp igilikke jetkizedi. Osyndai adamzat damýynyń igiligine qatysty Elbasymyz barshaǵa óziniń «Qazaqstannyń áleýmettik jańartylýy: Jalpyǵa ortaq Eńbek qoǵamyna qarai 20 qadam» atty baǵdarlamasyn jariia etti. Bul baǵdarlama qazaqstandyqtarǵa jańa serpin, jańa úmit syilaǵany anyq.
Baǵdarlama aiasynda qarastyrylǵan taqyryptar zamannyń ózekti máselelerine basa nazar aýdaryp, áleýmettik jańǵyrtý saiasatynyń negizine shynaiy óndiristik eńbekti qoiý mindeti artylǵan. «Bul – praktikalyq, pragmatikalyq ideia. Ol maǵan tipti etene jaqyn, óitkeni, men qazaqstandyqtar jaqsy biletindei, ózimniń kásibi jolymdy «aq saýsaqtar» sekildi kabinette de, parkette de emes, jumysshy-metallýrg retinde bastadym. Al bul, atap aitsam, naǵyz kásip bolyp tabylady!» degen Elbasynyń bul sózderinen jastardy eńbektiń túrli salasyn meńgerip, qiyndyqqa qaramastan eńbek jolyn óndiriste bastap, jumysshy maman bolýdan bas tartpai, óz úlgisin mysal ete otyryp, jastardy qajyrly eńbek etýge shaqyrdy.
Básekege qabiletti ult bolyp qalyptasýda keibir jastarymyzdyń psihologiiasynda qalyptasqan shetten tys qanaǵatshyldyq sezimi eńbek jolynda tabysty nátijege qol jetkizý úshin tájiribe jinaqtaýǵa, jańa maqsat-múddelerge, bolashaqqa talpynýǵa kedergi keltiredi. Kerisinshe, jastar eńbek etýde únemi jańa qarqynǵa, zamanaýi suranystarǵa sai bolyp otyrý maqsatynda óz-ózin únemi jetildirip, qamshylap otyrýy qajet. Buǵan Elbasynyń «Adam óziniń qaida bet alǵandyǵyn anyq kórgen kezde ǵana biikke qarai kúsh-jigermen umtylady» degen sózderi dálel bola alady.
Árine, naryqtyq ekonomika zamanynda básekege qabiletti bolý úshin baǵdarlamada qarastyrylǵan bilim berý júiesin jańǵyrtý jónindegi qadamdarǵa jaýapkershilikpen qaraý mańyzdy. Baǵdarlama mazmunynda kórsetilgen áleýmettik jańǵyrtý jolyndaǵy maqsat-talaptar igi bastamanyń nyshanyn bildiredi. «Eńbek etseń erinbei, toiady qarnyn tilenbei» dep dana babalarymyz aitqandai, eńbek etý degenimiz - ómir súrý, óz talaptaryńdy qanaǵattandyrý bolsa, jastardy bilim ordalarynan bastap-aq eńbekke baýlý jáne eńbek etýde bilimniń alar ornyn aiqyndap kórsetý – bizdiń mindetimiz.
Qazirgi zamandaǵy ǵylym men tehnikanyń jahandaný dáýirinde bilim alýdyń mańyzdylyǵyn tereń túsinip, teoriialyq bilimderin tájiribede, iaǵni óndiriste júzege asyrý ár azamattan talap etilse, barlyq óndiris salasynda ozyq tehnologiialardy igerý arqyly elimiz naryqta beldi oryn alary anyq.
Sońǵy kezderi elimizde óndiristik mekemelerdiń jii ashylýy halyqty jumys oryndarymen qamtamasyz ete alǵanymen, kei salalarda mamandardyń tapshylyǵy baiqalady. Rasynda da, bilim ordasyn jańa támamdaǵan keibir jas mamandar birden biik mansap pen joǵary jalaqyny qalaityny jasyryn emes. Biraq bul barlyq salada birdei múmkin bola bermeidi. Basty nazarda kásibi sheberlikti shyńdaý, bilikti maman retinde qalyptasý turýy tiis. Adal eńbekpen keletin eńbektiń jemisi berekeli, yrzyqqa toly bolatynyn eskerý qajet.
Elbasymyzdyń halyqqa arnaǵan atalmysh baǵdarlamasy aýqymdy mindetterdi qamti otyryp, halqymyzdyń eńbekqorlyǵy men básekege qabilettiligin oiatýǵa úndeý bolary anyq.
Qalabai G.B.
Qazaqstan Respýblikasy Din isteri jáne azamattyq qoǵam ministrligi Din isteri komiteti Din máseleleri jónindegi ǵylymi-zertteý jáne taldaý ortalyǵy ǵylymi qyzmetkeri
