Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine ónerkásiptik qaýipsizdik máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy QazAqparat.
Zań jobasy ónerkásiptik qaýipsizdik salasyndaǵy zańnama normalaryn jetildirýge, bizneske ákimshilik qysymdy azaitýǵa, qaýipti obektilerde memlekettik qadaǵalaýdy júzege asyrýdyń tiimdiligin arttyrýǵa, ónerkásiptik qaýipsizdik salasynda jumys júrgizý quqyǵyna attestattalǵan jáne avariialyq-qutqarý jumystaryn júrgizý boiynsha kórsetiletin qyzmetterdi usynatyn uiymdardyń qyzmetin retteýge baǵyttalǵan.
Atalǵan zań jobasy biyl mamyrda Májilistiń jalpy otyrysynda birinshi oqylymda maquldandy.
Zań jobasyn talqylaý kezinde jumys toby «Azamattyq qorǵaý týraly» Zańynyń uǵymdyq apparatyn naqtylaý men redaktsiialyq jaqsartýǵa qatysty túzetýler engizdi jáne olar bekitildi. Depýtattardyń usynysy boiynsha «Ónerkásiptik qaýipsizdik salasyndaǵy avariialyq-qutqarý qyzmetterin attestattaý» jańa babymen rettelgen ónerkásiptik qaýipsizdik salasyndaǵy avariialyq-qutqarý qyzmetterin attestattaý tetigi engiziledi.
Májilistiń Ekologiia máseleleri jáne tabiǵat paidalaný komitetiniń qorytyndysyna qaraǵanda, zań jobasymen «Arnaiy ekonomikalyq jáne indýstriialyq aimaqtar týraly» Zańǵa erekshe indýstriialyq aimaqtardy qurý, jumys isteý jáne taratý protsesin retteitin túzetýler, sondai-aq erekshe indýstriialyq aimaqtardyń aýmaǵynda jumys isteitin investorlarǵa ózderiniń investitsiialyq jobalaryna «bir tereze» qaǵidaty boiynsha saraptaýdy jáne kelisýdi júzege asyrýǵa múmkindik beretin normalar engiziledi.
Sondai-aq «Erekshe qorǵalatyn tabiǵi aýmaqtar týraly», «Janýarlar dúniesin qorǵaý, ósimin molaitý jáne paidalaný týraly» zańdarǵa túzetýler engizildi. Olar memlekettik-jekeshelik áriptestik sharttary boiynsha týristik jáne rekreatsiialyq qyzmetti júzege asyrý úshin erekshe qorǵalatyn tabiǵi aýmaqtardyń ýchaskelerin berý, kásipshilik balyq aýlaýdy yntalandyrý jáne balyq ósirý sharýashylyqtaryn damytý máselelerine qatysty boldy.
Budan basqa, «Jańartylatyn energiia kózderin paidalanýdy qoldaý týraly» Zańǵa energiia únemdeýge jáne resýrs únemdeýge, sondai-aq parniktik gazdar shyǵaryndylaryn qysqartý jónindegi Qazaqstannyń halyqaralyq mindettemelerin oryndaýǵa baǵyttalǵan qaitalama energetikalyq resýrstardy paidalaný tetigin iske qosatyn normalar engizildi.
