CLAAS traktorlary men kombaindarynyń quramdas bólikterin shyǵarý, AMAZONE tuqym sebý keshenderin óndirý jáne KamLit pen KIA kompaniialarymen seriktestik aiasynda Qazaqstanda alǵashqy Lokalizatsiialyq ortalyq iske qosyldy. Qostanai mashina jasaýshylarynyń biliktiligi arqasynda AGROMASH zaýyty biyl álemdik iri kompaniialarmen jumys isteýdi bastady, dep habarlaidy Ult.kz.
2024 JYLDYŃ QORYTYNDYSY
Óndiris 20%-ǵa ósti
«2023 jyly kásiporyn 1250 birlik aýylsharýashylyǵy tehnikasyn shyǵarsa, 2024 jyly bul kórsetkish 1500 birlikke jetti. Sonymen qatar traktorlar óndirisi aitarlyqtai artty: olardyń sany 1 100 birlikten asty. LOVOL traktorlary úsh jyl qatarynan eldegi eń kóp satylatyn traktorlardyń qatarynda bolsa, biyl ESSIL brendi kombaindar arasynda kósh bastap tur», – dedi kommertsiialyq direktor Nikolai Parhomenko.
ÓNDIRIS: CLAAS TEHNIKASY JÁNE AMAZONE KEShENDERI
Jyl saiyn Lokalizatsiialyq ortalyqta 250 myńnan astam toraptar men komponentter óndiriledi, olardyń bir bóligi zaýyttyń óz quiý tsehynda daiyndalady.
Qostanailyq mashina jasaýshylardyń aitýynsha, zamanaýi jabdyqtar men bilikti mamandardyń bolýy qazaqstandyq aýyl sharýashylyǵy jáne kommertsiialyq tehnika óndirýshilerine ónerkásiptik qurastyrý kelisimderin oryndaýǵa múmkindik beredi. Búginde LOVOL jáne DEUTZ-FAHR traktorlary men kombaindary, ESSIL kombaindary, sondai-aq basqa da tirkemeler men qondyrmalar AGROMASH óndiristik jelisinen shyǵarylady. Budan bólek, kásiporyn CLAAS, AMAZONE jáne KIA syndy álemdik brendterge qajetti bólshekterdi jasap jetkizedi.
«Lokalizatsiialyq ortalyqtyń múmkindikteri arqasynda kompaniia CLAAS traktorlary men kombaindaryna tasymaldaýshy arbalar, aldyńǵy júk kótergishter, satylar, tutqalar jáne basqa da bólshekter shyǵarady. Kelesi jyly bul tizimdi keńeitý josparlanǵan. Sonymen birge, qyrkúiek aiynda AMAZONE kompaniiasymen tirkemeli jáne soqpaly tehnika óndirý boiynsha kelisim jasaldy. Bizdiń mamandar nemis áriptesterimizden oqytý baǵdarlamasyn ótti, al óndiris zaýyt aýmaǵynda bastaldy. Jańa maýsymda qazaqstandyq fermerler 12 jáne 15 metrlik tuqym sebý keshenderin otandyq óndiristen ala alady. 2025 jylǵa jospar boiynsha – 50 keshen óndirý kózdelip otyr. Sonymen qatar, KIA zaýyty bizben birge Qazaqstan aýmaǵynda jańa óndiris ornyn qurý úshin quramdas bólshekterdi daiyndaý boiynsha kelisim jasasty. Biz quiý, dánekerleý, boiaý jáne daiyn bólshekter shyǵarý tsiklin tolyqtai qamtityn óndiris qyzmetterin usynamyz», – dedi AGROMASH zaýytynyń operatsiialyq tiimdilik jónindegi direktory Bahtiiar Balgýjin.
2025 JYL – QYZMET KÓRSETÝ JYLY
AGROMASH kompaniiasy 2025 jyldy resmi túrde Qyzmet kórsetý jyly dep jariialady. Bul sheshim servistik qyzmet kórsetý salasyn keńeitý jáne jaqsartý maqsatynda qabyldandy.
Servistik qyzmetti túrlendirý jumystary osy maýsymda bastaldy. Qazaqstandyq óndiristegi 100-ge jýyq JAC T6 avtokóligi holdingtiń filialdaryna satyp alyndy. Bul kólikter servistik mamandardyń fermerler suranysyna jedel jaýap berýin qamtamasyz etedi. Kompaniia infraqurylymdy jańǵyrtýǵa jáne tehnikalyq jabdyqtaryn jaqsartýǵa 5 milliard teńge kóleminde investitsiia bóldi.
«Biyl biz 100-den astam avtokólik satyp aldyq. Árbir kólik zamanaýi jabdyqtarmen qamtylǵan. Bul bizdiń mamandarǵa fermerlerdiń suranysyn jyldam qanaǵattandyrýǵa jáne aýyl sharýashylyǵy tehnikasyna qyzmet kórsetý sapasyn arttyrýǵa múmkindik beredi. Qazirgi ýaqytta 4 myńnan astam traktor men kombain bizdiń kepildi jáne kepildikten keiingi qyzmet kórsetý júiemizde tur. Satý kólemi maýsym saiyn artyp keledi, sondyqtan biz tehnikalyq jańǵyrtý jumystaryn úzdiksiz júrgizýimiz qajet», – dedi qyzmet kórsetý jáne qosalqy bólshekter bóliminiń direktory Samat Jambetaýlin.
2025 jyly kompaniia elimizdiń basty astyqty aimaqtarynda – Qostanai, Óskemen, Astana, Shymkent, Pavlodar, Almaty jáne Qaraǵandy qalalarynda servistik filialdaryn modernizatsiialap, jańa núkteler ashýdy josparlap otyr. Bul filialdar tolyqqandy sheberhanalar men qosalqy bólshekter qoimalarymen jabdyqtalatyn bolady.
