«Buqara-Oral» magistralinen Aqtóbe qalasyna úshinshi gaz qubyry tartylady. Bul týraly búgin Ortalyq kommýnikatsiialar qyzmetindegi baspasóz máslihatynda Aqtóbe oblysynyń ákimi Ońdasyn Orazalin aitty, dep habarlaidy "Ult aqparat".
«Jalpy, Aqtóbe qalasynda gaz tapshylyǵy baiqalady. Sheteldik investorlar zaýyt ashýǵa, basqa da kásiporyndar salýǵa yntalanyp otyr. Biraq biz olardy elektr qýatymen, gazben jáne basqa da infraqurylymmen qamtamasyz etýimiz kerek. Qazirgi tańda Aqtóbeniń ózinde gaz jetispeýshiligi bar. Biz «investitsiia tartamyz, jumys oryndaryn quryp, zaýyttar ashamyz» desek, áýeli gaz máselesin sheshýimiz kerek», - dedi ol.
Onyń atap ótýinshe, osyǵan bailanysty Aqtóbe qalasyna «Buqara-Oral» magistralinen úshinshi gaz qubyryn salý máselesi pysyqtalyp jatyr.
«Bul endi úlken joba. Keminde 40 mlrd teńgege deiin qarjyny qajet etedi. Soǵan bir jaǵynan qyzyǵýshylyq tanytyp otyrǵan investorlardy tartyp, ekinshi jaǵynan Úkimet qoldaýyna ie bolamyz dep otyrmyz. Bul qajet bolsa, biýdjetten de qarjylandyrýǵa tolyq múmkinshilik bar degen sóz. Degenmen, bul máseleni biz 2-3 jyldyń ishinde sheshýmiz kerek. Sebebi investitsiia tartamyz desek, oǵan tolyq jaǵdai jasaǵan jón», - dedi O.Orazalin.
