Esterińizde bolsa, qazir qaladaǵy qoǵamdyq kólikte qoldanylýy úirenshikti de qalypty jaǵdaiǵa ainalyp bara jatqan «Ońai» elekrondy kólik kartasy ústimizdegi jyldyń 11 qańtarynda qoldanysqa engizilgen bolatyn. Árine, alǵashqy kezde elektrondy biletke úirený qala turǵyndaryna ońai bolǵan joq. Tek, qalalyq qoǵamdyq kólikterde bir rettik jol júrý biletteri qaita jolǵa qoiylǵan soń ǵana, bul másele túbegeili sheshimin tapqandai bolǵan. Óitkeni, osy oraida «Ońaimen» jol júretin jolaýshylar sany da birte-birte óse túsip, odan qala biýdjetine túsken paida da arta bastady.
Jasyratyny joq, «Ońai» elektrondy kartasymen bir mezgilde qolma-qol bir rettik «Ońai» biletterin qoldaný – jol aqysyna tólengen aqshanyń jeke adamdardyń, iaǵni, bilet satatyn kondýktorlardyń qaltasyna túsýine sep bolǵany baiqala bastaǵan edi. Sóitip, qoǵamdyq kólikterde «qolma-qol bilet satý» úrdisi qaitadan jandana bastaǵandai boldy. Al, osyny túsingen qaladaǵy jolaýshylar tasymaly qyzmetteriniń basshylyǵy bir mezgil «Ońai» elektrondy kartasyn qoldanýdy qaldyryp, qolma-qol tólemdi jolaqy tóleý qyzmetinen alyp tastaǵan bolatyn. Biraq, jolaýshylar arasynda kópshiligi «Men «Ońai» kartasyna aqsha quiýdy umytyp ketippin» nemese «Jańa ǵana osy avtobýsqa otyrýdyń aldynda «Ońai» kartama aqsha quiyp edim, ol áli eseptelip úlgermei jatqan shyǵar» degen siiaqty neshe túrli syltaýlar aita bastady.
Sondyqtan da qalalyq Jolaýshylar kóligi basqarmasy osyndai syltaý aitýshylardyń pikirlerin eskere kele, «Ońai» kartasyn toltyrýdy «umytyp» ketýshilerge qarsy júrip, qala qoǵamdyq kólikterinde qolma-qol tólem júrgizý qyzmetin qaita engizýge májbúr boldy. Sóitip, osynyń saldarynan qaladaǵy jolaýshylar arasynda «Ońai» elektrondy kartasyn paidalanýshylar sany kúrt azaiyp ketti» degen sózder qaýlap ketti. Soǵan bailanysty, Almaty qalasy kólik holdingi halyq arasynda qaýlap ketken joǵarydaǵy pikirlerdi joqqa shyǵara otyryp, óz sózderin dáleldeý maqsatynda 2016 jylǵy on aidaǵy Almaty qalasy jolaýshylar tasymaldaý qyzmeti boiynsha «Ońai» elektrondy kartasyn satýdan túsken málimetterdi jariialady. Osylaisha 2016 jyldyń basynan beri «Ońai» kartasyn satýdan qalalyq biýdjetke myna mólsherde qarjy túsken deidi:
qańtar – 750 535 860,00 teńge;
aqpan – 1 821 666 140,00 teńge;
naýryz – 3 179 069 071,77 teńge;
sáýir – 4 508 625 245, 37 teńge;
mamyr – 5 557 979 045, 84 teńge;
maýsym – 6 494 253 554, 89 teńge;
shilde –7 242 829 007, 60 teńge;
tamyz – 8 087 333 025, 06 teńge;
qyrkúiek – 9 228 838 380, 35 teńge;
qazan – 10 082 056 560, 35 teńge…
Kórip otyrǵanymyzdai, «Ońai» elektrondy kartasyn paidalaný arqyly qalalyq biýdjetke túsken qarjy ainalymy ai ótken saiyn ósip otyrǵan. Bul rette almatylyqtardyń jańa reformaǵa qoldaý tanytýlary da jaǵdaidyń jetistikke jetýine múmkindik bergen. Árine, joǵaryda keltirilgen tizimde qarasha men jeltoqsan ailary kórsetilmegen. Degenmen, bizdiń ózimiz de jolaýshy retinde kózben kórgenimizdi baiandasaq, bul eki aida qoǵamdyq kólikterde «Ońai» elektrondy kartasyn paidalanýshylar sany kemimegeni turmaq, qaita kóbeie túskenin ańǵarǵanymyz jasyryn emes.
Quttybek AIMAHAN, "Almaty aqshamy" gazeti
