Qazaqstan men Resei arasyndaǵy qarym-qatynastar tabysty damyp keledi, degenmen yntymaqtastyq máseleleri boiynsha taraptar arasynda jii pikirtalastar týyndaidy. Bul týraly Resei prezidenti Vladimir Pýtin Sankt-Peterbýrg halyqaralyq ekonomikalyq forýmy aiasynda BAQ ókilderimen kezdesýde málimdedi, dep habarlaidy ult.kz.
«Qazaqstanmen qarym-qatynasymyz óte tabysty, órleý baǵytynda damyp keledi. Sonymen qatar birden atap ótkim keledi: qazaqstandyq dostarymyz, seriktesterimiz onsha ońai seriktester emes. Bizde árbir derlik másele boiynsha óte qyzý pikirtalastar júredi.
Bul qarjy salasyndaǵy qatynastarǵa, ónerkásiptegi bailanystarǵa, investitsiialyq qyzmettiń sharttaryna, iri jobalarǵa qatysty. Biraq eki tarapta da tek ózara tiimdi emes, ortaq maqsattarǵa jetýge yqpal etetin ymyrany tabýǵa degen niet bar. Al ortaq maqsat bireý – Qazaqstan men Resei azamattarynyń ál-aýqatyn arttyrý jáne elderdiń damýyn qamtamasyz etý», – dedi Pýtin.
Ol Qazaqstan men Reseidi kópǵasyrlyq tarih bailanystyratynyn atap ótip, eki el yntymaqtastyǵynyń bolashaǵy zor baǵyttarynyń biri bilim berý salasy ekenin aitty.
«Bilim berýdiń beretin artyqshylyqtaryn odan ári damytýǵa qyzyǵýshylyq óte joǵary. Bul Qazaqstandaǵy bilim berý deńgeiine de, Resei Federatsiiasyndaǵy bilim berý júiesiniń jańa damý úrdisterine de qatysty. Ózderińiz biletindei, biz Qazaqstan Prezidentimen birge daryndy balalardy izdeý jáne qoldaýdyń tiimdi tásilderin qalyptastyrǵan “Siriýs” júiesiniń jumysyn bastaý rásimine qatystyq. Qazaqstanda talantty balalar óte kóp, olardy tek taýyp, qoldaý qajet. Bizdiń yntymaqtastyǵymyzdyń osy baǵyty dál osyǵan arnalady», – dedi Pýtin.
Qazaqstan-Resei yntymaqtastyǵynyń negizgi baǵyttaryna toqtalǵan Resei prezidenti energetika, ónerkásip, ǵarysh salasy jáne Qazaqstandaǵy atom elektr stantsiiasynyń qurylysyna erekshe nazar aýdardy.
«Qazaqstan – álemde asa qajet ári suranysqa ie tabiǵi resýrstarǵa óte bai memleket ekenin atap ótkim keledi. Men elektr stantsiialary men atom elektr stantsiialaryna arnalǵan otyn týraly aityp otyrmyn. Biz Qazaqstanmen osy baǵytta tabysty yntymaqtastyq ornattyq. Óziniń tabiǵi resýrstyq áleýetine súiene otyryp jáne birlesken múmkindikterdi damyta otyryp, Qazaqstan energetika salasyndaǵy kóptegen mindetterdi sheship, úlken jetistikterge jetedi dep senemin. El energiia kózderin ártaraptandyrady. Meniń bilýimshe, Qazaqstan qajetti elektr energiiasynyń shamamen 20 paiyzyn atom elektr stantsiiasy arqyly óndirýdi josparlap otyr», – dedi Pýtin.
Ol sondai-aq Qazaqstan men Resei ýran óndirý salasyndaǵy birlesken jumystardy jalǵastyratynyn aitty. Onyń pikirinshe, atom elektr stantsiiasy jobasyn júzege asyrý eldi qosymsha energetikalyq qýatpen qamtamasyz etip qana qoimai, ekonomikanyń jańa salasyn qalyptastyrýǵa múmkindik beredi.
Pýtinniń aitýynsha, atom energetikasyn damytý mamandar daiarlaýmen, ǵylymi zertteýlerdi keńeitýmen jáne óndiristik bazany qurýmen qatar júredi. Budan bólek, taraptar ǵarysh salasynda, mashina jasaýda jáne basqa da birqatar baǵyttarda yntymaqtastyqty damytýǵa nietti ekenin rastady.
Jýrnalister sondai-aq Amýr jolbarystaryn Qazaqstanǵa berý máselesiniń mańyzy týraly surady. Suraq bul qadamdy tek ekologiialyq joba retinde ǵana emes, eki el arasyndaǵy senimniń belgisi retinde qarastyrýǵa bola ma degen turǵyda qoiyldy.
«Jolbarystarǵa qatysty aitsaq, bul – tabiǵi nárse. Biz tabiǵatty, ekologiiany, ósimdikter men janýarlar dúniesin qalpyna keltirýdi oilaimyz. Bizge de kómektesedi. Mysaly, Tájikstan bizge qar barystaryn syilaǵan bolatyn, sol úshin tájik dostarymyzǵa rizamyz. Biz Qiyr Shyǵys jolbarystarynyń popýliatsiiasyn saqtap qalý úshin kóp jumys atqardyq. Aitpaqshy, bular álemdegi eń iri jolbarystar. Odan úlken jolbarys joq. Buryn Qazaqstanda da osyǵan uqsas jolbarystar bolǵan. Eger biz qazaqstandyq dostarymyzǵa kómektese alsaq, árine, kómektesemiz», – dedi Pýtin.
Resei prezidenti jolbarystar men basqa da sirek kezdesetin janýarlardyń popýliatsiiasyn saqtaý ekologiialyq yntymaqtastyqtyń mańyzdy baǵyty ekenin atap ótti.
Sonymen qatar taraptar transshekaralyq ózenderdiń sý resýrstaryn paidalaný máselelerin qosa alǵanda, ekologiia salasyndaǵy praktikalyq máseleler boiynsha dialogty jalǵastyrýǵa nietti ekenin málimdedi.
