Saiasattanýshy Daniiar Áshimbaev Qazaqstan Prezidenti Qasym-Jomart Toqaevtyń Resei-Ýkraina qaqtyǵysyna qatysty málimdemelerine taldaý jasady. Ol Memleket basshysynyń jekelegen sózderin bólek qaramai, Qazaqstannyń syrtqy saiasi ustanymynyń tutas kórinisi retinde baǵalaý qajet ekenin aitty, dep habarlaidy ult.kz.
Áshimbaevtyń pikirinshe, Toqaev tájiribeli diplomat ári Qazaqstan siiaqty memleket basshysy retinde pragmatikalyq ustanymyn ashyq aityp keledi.
Saiasattanýshy Prezidenttiń Reseimen dostyq jáne odaqtastyq qatynastardy saqtai otyryp, Ýkrainamen de yntymaqtastyqtan bas tartpaitynyna nazar aýdardy.
Sonymen qatar, onyń aitýynsha, Toqaev Qazaqstannyń memleketterdiń aýmaqtyq tutastyǵyn saqtaý qaǵidatyn turaqty túrde ustanyp keledi. Prezident Germaniiadaǵy brifingte de Qazaqstannyń BUU Jarǵysyn basshylyqqa alatynyn jáne barlyq memlekettiń aýmaqtyq tutastyǵyn qurmetteitinin aitty.
Toqaev soǵysty toqtatýdy emes, áskeri is-qimyldy toqtata turýdy usyndy
Áshimbaev Prezidenttiń Ombyda aitqan sózine qatysty Germaniiada bergen túsiniktemesine de toqtaldy.
Toqaev buǵan deiin soǵysty birden toqtatýǵa shaqyrmaǵanyn aitty. Onyń sózinshe, qazirgi jaǵdaida mundai qadamdy iske asyrý shynaiy bolmaýy múmkin. Prezidenttiń usynysy – Ýkraina aýmaǵyndaǵy áskeri is-qimyldy ýaqytsha toqtatyp, keiin diplomatiialyq nemese basqa da kelissózder protsesine kóshý.
«Men soǵysty dereý toqtatý týraly aitpadym. Qazirgi jaǵdaida bul, bálkim, múmkin emes ekenin túsinemin. Men Ýkraina aýmaǵyndaǵy áskeri is-qimyldy toqtatyp, diplomatiialyq nemese kez kelgen kelissózder protsesine kóshý týraly aityp otyrmyn. Bizdiń ustanymymyz osy», – dedi Qasym-Jomart Toqaev.
Áshimbaevtyń paiymynsha, Qazaqstannyń ustanymy qaqtyǵysty beibit jolmen retteýge baǵyttalǵan.
«Ár qaqtyǵystyń rettelý joly bolýy kerek»
Saiasattanýshy Qazaqstannyń áskeri qaqtyǵystarǵa qatysty ustanymyn eldiń jalpy syrtqy jáne ishki saiasatynyń qaǵidalarymen bailanystyrdy.
Onyń aitýynsha, kez kelgen qaqtyǵystyń tarihy men sebepteri bolǵanymen, ony retteýdiń joly men perspektivasy da bolýy qajet.
«Qazaqstan, basqa elder men halyqtar siiaqty, barlyq baǵyttaǵy áskeri qaqtyǵystardan sharshady», – dep jazdy Daniiar Áshimbaev.
Ol Qazaqstan saiasatynyń negizinde pragmatizm, yntymaqtastyq jáne kelisim qaǵidattary jatqanyn atap ótti.
Saiasattanýshynyń pikirinshe, Qazaqstan úshin Reseimen de turaqty qarym-qatynas mańyzdy, sonymen birge Eýraziiada beibitshilik pen turaqtylyqtyń saqtalýy da mańyzdy.
«Qazaqstan Reseidiń kúshti bolǵanyna da, Eýraziiada beibitshilik ornaǵanyna da múddeli», – dep túiindedi Daniiar Ashimbaev.
