Aqtóbede qarjy piramidasyna qatysty tergeý júrip jatyr. Qazir 10 myńnan astam adamnyń aqsha salǵany anyqtaldy, dep habarlaidy "Ult aqparat".
Aqtóbe oblystyq politsiia departamenti «Gold» qarjy piramidasyna aqsha aýdaryp, paidaǵa kenelmek bolǵandardyń tizimin jasap jatyr. Qazir sot aldy tergeý jumystary bastaldy.
«Qazirgi ýaqytta 10 myńnan astam salymshy anyqtaldy. Olardyń shyǵyny eseptelip jatyr. «Gold» JShS-men arada kelisimshart bar. Zergerlik buiymdardy baǵalaý, zergerlik buiymdardy satý men servistik qyzmet týraly ǵana jazylǵan. Buǵan deiin birneshe ret BAQ arqyly beimálim uiymdarǵa qarjy salmaý, saq bolý týraly eskertip, habarlama bergen bolatynbyz. Ári áleýmettik jeline taratqan aqparattarǵa senýge bolmaidy», - dedi Aqtóbe oblystyq politsiia departamenti bastyǵynyń orynbasary Samat Aisov.
Aqtóbelik salymshylar seriktestik ǵimaratyna baryp, politsiia qyzmetkerlerimen kezdesti.
«Kóbi alǵashqy kezeńde eskertip, habarlama berý kerek edi dep ýáj aitty. Kompaniia jumysyn toqtatpas buryn Ulttyq bank, memlekettik kirister organdaryna suranys jiberip, qarjylyq qyzmeti týraly bilýimiz kerek. Teksere kele, Resei azamattarynyń eshqandai esepshoty joq ekenin bildik. Býhgalterlik esep júrgizilmegen. Basshylary keshkilik kelip, seiften aqsha alyp otyrǵan. Bary osy», - dedi Samat Aisov.
Eske salsaq, osy oqiǵa boiynsha Qylmystyq kodekstiń 217-baby, iaǵni, «Qarjy (investitsiialyq) piramidasyn qurý jáne basqarý» boiynsha qylmystyq isti tergeý sheńberinde uiym keńsesinde tintý júrgizildi. Qujattama, kompiýterlik tehnika tárkilendi.
