Jambyl oblysyndaǵy áskeri qoimadaǵy órtke alǵash bolyp barǵan 22 jastaǵy órt sóndirýshi Álibi Keńesti týystary áli taba almai jatyr. Úsh kúnnen beri ulyn izdegen anasy tósek tartyp qaldy, al ákesi, týystary men synyptastary qoima mańyn izdeýden nátije bolmai otyrǵanyn aitady. Týysqandarynyń aitýynsha, Álibidi jaqyndarynan basqa eshkim izdestirip jatqan joq dep habarlaidy Aibat arnasyna silteme jasaǵan KAZ.NUR.KZ.
Álibidiń órt sóndirýshi bolyp jumysqa ornalasqanyna kóp bolmaǵan. Nemere ápkesiniń aitýynsha, ol jaqynda ǵana áskerden oralypty. Týystary tájiribesi joq 22 jastaǵy jigitti ottyń ortasyna jibergeni úshin kúiinýde.
"Álibi áskerden jańa ǵana kelgen. On ekide bir gúli ashylǵan joq. Eshkimniń basyna bermesin, bireýdiń jalǵyz balasy. Órimdei balany otqa apardy da salyp jiberdi. Arystan keiin eki jyl ótken soń taǵy bolyp otyr. Ne kútemiz biz?", - deidi Álibidiń nemere ápkeleri Seisekúl men Raihan Ázimbaevalar.
Álibi Keńestiń anasy ulynan habar almaǵaly beri tósekten tura alar emes. Ol úsh qaryndasynyń aǵasy, tula boiy tuńǵyshynan habar bolmaǵan soń, tósek tartyp qaldy. Búginde onyń qan qysymy jii kóterilýde.
Álibi úidiń úlkeni. Úsh qaryndasy bar.
"Men Álibi kókemdi túsimde kórdim. Ol úsheýmizdi qushaqtap, "janym sol" dep aitty. Biraq uiyqtap jatyr ekem, túsim eken. Men Álibi kókemdi saǵyndym, ol ólmese eken", - dep jylady Álibidiń kishkentai qaryndasy.
Búginde Tarazdaǵy máiithana taǵy eki adamnyń denesi tabylǵanyn habarlady. Biraq olar marqumdardyń kim ekenin aitar emes.
Al Álibidiń ákesi, týystary men synyptastary jarylys bolǵan aimaqty qansha izdese de, 22 jastaǵy jigitti taba alar emes.
Aita ketelik, 26 tamyz kúni Jambyl oblysynyń Baizaq aýdanynda bolǵan jarylystan 13 adam qaza tapty.
