جامبىل وبلىسىنداعى ەسكەري قويماداعى ٶرتكە العاش بولىپ بارعان 22 جاستاعى ٶرت سٶندٸرۋشٸ ەلٸبي كەڭەستٸ تۋىستارى ەلٸ تابا الماي جاتىر. ٷش كٷننەن بەرٸ ۇلىن ٸزدەگەن اناسى تٶسەك تارتىپ قالدى, ال ەكەسٸ, تۋىستارى مەن سىنىپتاستارى قويما ماڭىن ٸزدەۋدەن نەتيجە بولماي وتىرعانىن ايتادى. تۋىسقاندارىنىڭ ايتۋىنشا, ەلٸبيدٸ جاقىندارىنان باسقا ەشكٸم ٸزدەستٸرٸپ جاتقان جوق دەپ حابارلايدى Aibat ارناسىنا سٸلتەمە جاساعان KAZ.NUR.KZ.
ەلٸبيدٸڭ ٶرت سٶندٸرۋشٸ بولىپ جۇمىسقا ورنالاسقانىنا كٶپ بولماعان. نەمەرە ەپكەسٸنٸڭ ايتۋىنشا, ول جاقىندا عانا ەسكەردەن ورالىپتى. تۋىستارى تەجٸريبەسٸ جوق 22 جاستاعى جٸگٸتتٸ وتتىڭ ورتاسىنا جٸبەرگەنٸ ٷشٸن كٷيٸنۋدە.
"ەلٸبي ەسكەردەن جاڭا عانا كەلگەن. ون ەكٸدە بٸر گٷلٸ اشىلعان جوق. ەشكٸمنٸڭ باسىنا بەرمەسٸن, بٸرەۋدٸڭ جالعىز بالاسى. ٶرٸمدەي بالانى وتقا اپاردى دا سالىپ جٸبەردٸ. ارىستان كەيٸن ەكٸ جىل ٶتكەن سوڭ تاعى بولىپ وتىر. نە كٷتەمٸز بٸز?", - دەيدٸ ەلٸبيدٸڭ نەمەرە ەپكەلەرٸ سەيسەكٷل مەن رايحان ەزٸمباەۆالار.
ەلٸبي كەڭەستٸڭ اناسى ۇلىنان حابار الماعالى بەرٸ تٶسەكتەن تۇرا الار ەمەس. ول ٷش قارىنداسىنىڭ اعاسى, تۇلا بويى تۇڭعىشىنان حابار بولماعان سوڭ, تٶسەك تارتىپ قالدى. بٷگٸندە ونىڭ قان قىسىمى جيٸ كٶتەرٸلۋدە.
ەلٸبي ٷيدٸڭ ٷلكەنٸ. ٷش قارىنداسى بار.
"مەن ەلٸبي كٶكەمدٸ تٷسٸمدە كٶردٸم. ول ٷشەۋمٸزدٸ قۇشاقتاپ, "جانىم سول" دەپ ايتتى. بٸراق ۇيىقتاپ جاتىر ەكەم, تٷسٸم ەكەن. مەن ەلٸبي كٶكەمدٸ ساعىندىم, ول ٶلمەسە ەكەن", - دەپ جىلادى ەلٸبيدٸڭ كٸشكەنتاي قارىنداسى.
بٷگٸندە تارازداعى مەيٸتحانا تاعى ەكٸ ادامنىڭ دەنەسٸ تابىلعانىن حابارلادى. بٸراق ولار مارقۇمداردىڭ كٸم ەكەنٸن ايتار ەمەس.
ال ەلٸبيدٸڭ ەكەسٸ, تۋىستارى مەن سىنىپتاستارى جارىلىس بولعان ايماقتى قانشا ٸزدەسە دە, 22 جاستاعى جٸگٸتتٸ تابا الار ەمەس.
ايتا كەتەلٸك, 26 تامىز كٷنٸ جامبىل وبلىسىنىڭ بايزاق اۋدانىندا بولعان جارىلىستان 13 ادام قازا تاپتى.
