16 jeltoqsan kúni Reseidiń Omsk qalasynda Qazaqstan kinosy festivali aiasynda Sh.Aimanov atyndaǵy «Qazaqfilm» AQ týyndylary kórsetiledi, dep habarlaidy "Ult aqparat" kinostýdiianyń baspasóz qyzmetine silteme jasap.
Atap aitqanda, «Vavilon» kino ortalyǵynda Aqan Sataevtyń «Elbasy joly. Astana» kartinasy jáne rejisser Adai Ábildinovtiń «Kúltegin» tolyqmetrajdy animatsiialyq filmi kórsetiledi.
«Elbasy joly. Astana» filmine elordamyzdyń salyný tarihy arqaý bolǵan. Oqiǵa 1994 jyldyń shilde aiynan bastaý alady. Keńes Odaǵy ydyraǵannan keiin Qazaqstannyń táýelsiz dara joly bastalady.
Al «Kúltegin» tarihi animatsiialyq filmi kóshpendi halyqtardyń basyn biriktirip, kóshpendilerdiń dástúrin jalǵastyrǵan túrik qaǵanatynyń dańqty áskeri qolbasshysy Kúlteginniń balalyq shaǵy týraly baiandaidy.
«Aita ketsek, 2020 jyldyń qańtar aiynda ótetin Omsk qalasyndaǵy Qazaqstan kinosy festivali sheńberinde «Qazaq handyǵy. Altyn taq» tarihi filminiń orys tilinde titrleri bar nusqasy kórsetiledi. Bul týyndyń rejisseri – Qazaqstannyń eńbek sińirgen qairatkeri, stsenarist ári sýretshi Rústem Ábdirashev»,- dep habarlady «Qazaqfilm» AQ baspasóz qyzmetinen.
Bul aýqymdy tarihi film Iliias Esenberlinniń «Almas qylysh» romanynyń negizinde jazylǵan «Qazaq handyǵy» kinodiologiiasynyń birinshi bólimi. Esterińizge sala ketsek, bul film 15-ǵasyrda Qazaq handyǵynyń qurylý tarihy týraly baiandaidy. Jobanyń ideia avtory – QR Tuńǵysh Prezidenti-Elbasy Nursultan Nazarbaev.
Festival aiasynda kórsetiletin týyndylardy QR Mádeniet jáne sport ministrligi tapsyrysy boiynsha Sh.Aimanov atyndaǵy «Qazaqfilm» AQ túsirgen.
