Túrkistan oblysynyń ákimi Ómirzaq Shókeev bir ai boiy Arys qalasynda turyp, qalany qalpyna keltirý jumystaryn jeke qadaǵalaityn bolady. Bul jaily onyń keńesshisi Sáken Qalqamanov málim etti, – dep habarlaidy QazAqparat.
Búgin tańerteń qala turǵyndary óz úilerine oraldy. Ár oblys ákimdikteri tarapynan qalany qalpyna keltirý jumystary bastalyp ketti. Buǵan deiin belgili bolǵandai, qala 17 sektorǵa bólinip, onyń árqaisysyna belgili bir óńir jaýapty bolady.
Máselen, Almaty ákimdigi 14-shi sektorǵa jaýap berip, 450 úidiń jóndeý jumystaryn júrgizedi. Ulttyq kompaniialar áleýmettik infraqurylym nysandaryn: mektepterdi, aýrýhanalardy, HQO ǵimarattaryn, saýda ortalyqtary men taǵy da basqasyn qalpyna keltiretin bolady. Sáken Qalqamanov oblys ákimi osy isterdiń basy-qasynda bolyp, ózi qadaǵalaitynyn aitty.
