Búgin QR Premer-Ministriniń orynbasary – Aýyl sharýashylyǵy ministri Ómirzaq Shókeev Túrkistan oblysynyń Sairam aýdanynda arnaiy jumys saparymen boldy. Elbasynyń 2018 jyldyń 5 qazanyndaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna arnaǵan Joldaýyn talqylaý maqsatymen kelgen vitse-premer aýdandaǵy «DALA-FRUIT.KZ» JShS men «Nurym Group» JShS-nde bolyp, ondaǵy sharýashylyqtyń búgingi jai-kúiimen tanysty.
Eń aldymen, «DALA-FRUIT.KZ» JShS-niń qarqyndy baý sharýashylyǵyndaǵy birshama jetistikterge kýá bolǵan Ó.Shókeev oblysta jemis-jidek, júzim sharýashylyǵynyń egis kólemin ulǵaitý, gektar túsimdiligin arttyrý máselesi barlyq ýaqytta kún tártibinen túspei, árdaiym damyp kele jatqanynan habardar boldy.
Aita ketsek, qarqyndy baý sharýashylyǵyn memlekettik qoldaýdyń arqasynda, jemis-jidek daqyldary men júzimniń kópjyldyq ekpeleriniń kólemi jyldan-jylǵa ulǵaiýda. Sonymen qatar, baý aralyq agrotehnologiialardy júrgizý úshin qajetti tehnikalarǵa jáne satylyp alynǵan sheteldik, otandyq kóshetterge sýbsidiia tólenýde. Bul kómekter taýar óndirýshilerdiń qarqyndy baý egýge degen qyzyǵýshylyǵyn arttyryp, aǵymdaǵy jyly 0,9 myń ga jemis, 0,4 myń ga júzim, 0,2 myń ga jańǵaq, 0,1 myń ga tańqýrai egildi.
Oblys boiynsha jemis-jidektiń kólemi 17,5 myń ga, júzim 9,6 myń ga qurap, 2018 jyly jemis-jidekten 116,4 myń tonna, júzimnen 72,0 myń tonna ónim alyndy. Taýar óndirýshilerdi otandyq jemis pen júzimniń elitalyq kóshetimen qamtamasyz etý maqsatynda 7 kóshet óndiretin elitalyq sharýashylyq uiymdastyrylǵan.
Óz kezeginde, QR Premer-Ministriniń orynbasary – Aýyl sharýashylyǵy ministri Prezidenttiń Qazaqstan halqyna arnaǵan Joldaýynda agroónerkásip kesheniniń áleýetin tolyq iske asyrý kerektigin jáne negizgi mindet - eńbek ónimdiligi men qaita óńdelgen aýyl sharýashylyǵy óniminiń eksportyn 2022 jylǵa qarai 2,5 ese kóbeitý týraly tapsyrma bergenin aityp, agroónerkásip kesheninde atalǵan tapsyrmaǵa qol jetkizý úshin salany ártaraptandyrý, onyń ishinde mal sharýashylyǵyn damytýdyń alatyn orny erekshe ekenin atap ótti.
Bul rette, Ó.Shókeevke «Túrkistan oblysynyń et klasterin» odan ári damytý maqsatynda taiaýda jumysyn bastaityn Sairam aýdanyndaǵy «Nurym Group» JShS-i kórsetildi. Aýdannyń Mankent aýylynan ashylatyn mal bordaqylaý alańy «Qaiyp ata» JShS-niń enshiles uiymy bolyp tabylady. Negizgi baǵyty - 10 000 bas iri qara maldardy bordaqylaý alańynda semirtý, sonymen qatar, qurama jem tsehy men mal soiý alańymen qamtý. Jobanyń quny 3,456 mlrd tenge. Qarjylandyrý kózi - 2,368 mlrd. teńge jeke qarjysy, 1 088 mlrd tg nesielik qarjy. Bolashaqta 80 adamdy jumyspen qamtýdy kózdep otyrǵan seriktestik jylyna 5 myń tonna et óndiretin bolady.
Oblysta qazirgi tańda iri qara mal sany - 948 020 bas, onyń ishinde analyǵy 451 216 bas. Syiymdylyǵy 176 430 basty quraityn shaǵyn 10-15 bastyq 14 myńnan astam mal bordaqylaý alańdary bar. Munan bólek, syiymdylyǵy 18 000 basty quraityn 1000 bastan bastalatyn 8 bordaqylaý alańy bar. Jalpy, barlyq mal bordaqylaý alańdarynyń syiymdylyǵy 194 430 basty quraidy.
Búgingi kúni jalpy 7 myń tonna iri qara mal eti Iran men Ózbekstan elderine eksporttaldy. Syiymdylyǵy 5 myń bastyq iri qara maldy bordaqylaý alańy, «Qaiyp ata» JShS-i búgingi kúni Respýblika boiynsha eń úlken mal etin eksporttaýshy bolyp tabylady. Et óndirý qýattylyǵy jylyna 4 myń tonna.
Óńirimizge sapary sońynda Ó.Shókeev qos sharýashylyqtyń jumystaryna oń baǵasyn berip, Elbasy Joldaýyn iske asyrýda Túrkistan oblysynda qarqyndy baý sharýashylyǵyn damytyp, óńirimizdiń árbir aýdanynda iri mal bordaqylaý alańdaryn salýdy tapsyrdy.
Ómirzaq Shókeev Sairam aýdanynda arnaiy jumys saparmen boldy
