Túrkistan oblysynyń ákimi Ómirzaq Shókeev jańadan qurylǵan Saýran aýdany týraly aityp berdi, dep habarlaidy QazAqparat.
«Óńirde Saýran aýdany jańadan qurylǵan edi. Ondaǵy turǵyndar men qyzmetkerler qandai máselelerge tap boldy?», - dep suraq qoidy tilshiler Ortalyq kommýnikatsiialar qyzmetinde.
«Shynynda da, Úkimet jáne Prezident Túrkistan oblysynda jańa aýdan qurý týraly sheshim qabyldady. Bul óte negizdi. Sebebi Túrkistan oblysyn qurýda Túrkistan qalasynyń barlyq irgeles aýyldyq okrýgteri Kentaý qalasyna berildi. Kentaý da qiyn jaǵdaiǵa tap boldy – ne qala, ne aýyl, ne aýdan ortalyǵy ekeni túsiniksiz boldy. Aýyldyq okrýgter aýdan ortalyǵynan óte alys ornalasqan. Kóptegen qolaisyzdyqtar boldy. Oǵan qosa, úlken aýyldarda mysaly, 12 myń turǵyny bar Shornaqta is júzinde bilik qurylymdary bolmady. 12 myń turǵynǵa berilgen bir ýchaskelik inspektor máseleni sheshe almaityn edi. Sondyqtan janjaldy oqiǵalar bolǵanyn bilesizder. Qazir aýdan jańadan qalyptasýda. Sheshim qabyldanǵannan beri jeti ai ótti. Aýdan ákimdigi tolyqtai jumys isteýde. Qazir bul aýdanda 35 eldi meken bar. Shornaq aýdan ortalyǵy boiynsha damytýdyń bas jospary ázirlendi. Ákimshilik ortalyq salý úshin kent ishinde 38 gektar jer bólindi. Bul maqsatqa respýblikalyq biýdjetten qarajat oblystyq biýdjet arqyly bólinedi. Kelesi jyly úlken qurylys jumystary bolady. Jalpy, turǵyndar úshin bul óte yńǵaily boldy», - dep jaýap berdi Ó. Shókeev.
