Atyraýda bir otbasynyń tórt múshesin óltirgeni úshin ómir boiyna bas bostandyǵynan aiyrylǵan Sultan Sársemálievke qatysty sot úkimine apelliatsiialyq shaǵym tústi. Alaida shaǵymdy sottalǵannyń ózi emes, basqa mekeme bergen, dep habarlaidy ult.kz.
«Sot kabineti» júiesindegi málimetke sáikes, apelliatsiialyq shaǵym 2026 jylǵy 29 shildede tirkelgen. Atyraý oblystyq sotynyń málimetinshe, shaǵym Sársemálievtiń ózinen túspegen.
Sot úkimi jariialanǵan kezde sýdia birneshe mekeme basshysyna qatysty jekeshe qaýly shyǵarǵan. Apelliatsiialyq shaǵym sol mekemelerdiń birinen berilgen.
Al Sultan Sársemálievtiń ózi ázirge apelliatsiialyq sot alqasyna júginbegen. Osyǵan bailanysty qazirgi apelliatsiialyq shaǵymnyń ómir boiǵy jazany ózgertý týraly emes, sot úkiminde kórsetilgen basqa máselelerge qatysty ekeni ańǵarylady. Úkim ázirge zańdy kúshine engen joq.
Eske salaiyq, 14 shildede Atyraý oblysynda burynǵy jubaiynyń týystaryn óltirgen Sultan Sársemáliev ómir boiyna bas bostandyǵynan aiyrylǵan edi. Sot ony birneshe qylmys boiynsha kináli dep tanyp, qaýipsizdigi erekshe túzetý mekemesinde jazasyn óteýge úkim shyǵarǵan.
