«Omikron» Covid-19 virýsynyń jańa shtamy jáne osy virýstyń mýtatsiiasynyń nátijesi bolyp tabylady. Bul týraly Almatydaǵy №11 qalalyq emhanasynyń mobildi tobynyń dárigeri Erjan Tólegenov málimdedi, dep habarlaidy QazAqparat.
Dárigerdiń aitýynsha, alǵashqy shtamdar sekildi «omikronnyń» da ózindik inkýbatsiialyq kezeńi, klinikalyq kórinisi men asqynýlary bolady.
«Egde jastaǵy adamdar inkýbatsiia kezeńi ótip jatqan adammen bailanysta bolǵanda jańa shtamdy juqtyrýy múmkin. Omikronnyń simptomatikasy JRVI-ge óte uqsas, tipti, keibir naýqastar virýstyń tasymaldaýshysy ekenin bilmeýi de múmkin. Osylaisha olar virýsty basqa adamdarǵa, týystaryna da juqtyra alady. Nátijesinde eldegi epidemiologiialyq jaǵdaidy nasharlap, eresekter arasynda aýrýshańdyqty arttyrady», - dedi Erjan Tólegenov.
«Omikron» belgileri ártúrli bolýy múmkin. Bas aýrýynan bastap, aiqyn entigýge deiin.
Spikerdiń aitýynsha, negizgi belgileri – bas aýrýy, murynnan sý aǵý, jutynǵanda tamaq aýrýy, dene qyzýynyń kóterilýi, omyrtqa, býyndar men bulshyqetterdegi aýyrsyný. Eger diagnostikalyq jáne emdik sharalar der kezinde bastalmasa, densaýlyq nasharlai túsedi.
«Egde jastaǵy adamdarǵa keler bolsaq, olardyń sozylmaly aýrýlary bar ekenin, atap aitqanda, olardyń kópshiligi júrek-qan tamyrlary, onkologiialyq aýrýlarmen, qant diabetimen aýyrady, ókinishke orai, «omikron» negizgi aýrýdy aýyr asqyndyrýy múmkin», - dedi dáriger.
Erjan Tólegenov Covid-19-ǵa qarsy immýnitetti damytýdyń turaqty jáne qaýipsiz joly vaktsinatsiia ekenin taǵy da eske saldy.
