Reseidiń Omby qalasyndaǵy aýrýhanada essiz jatqan saiasatker Aleksei Navalnyidy Germaniia astanasy Berlinge ushaqpen alyp ketti. Bul týraly saiasatkerdiń baspasóz hatshysy Kira Iarmysh habarlady.
"Aleksei mingen ushaq Berlinge ushyp ketti. Qoldaǵanyńyz úshin barlyǵyńyzǵa rahmet. Alekseidiń ómiri men densaýlyǵy úshin kúres endi bastalyp jatyr. Áli kóp nárseden ótý kerek, biraq qazir birinshi qadam jasaldy" dedi Iarmysh Twitter jelisinde.
Aleksei Navalnyi Omby aýrýhanasynyń jansaqtaý bólimine 20 tamyz kúni aýyr halde tústi. Ol sol kúni Tomskiden Máskeýge baǵyt alǵan ushaqta bolǵan. Biraq reis kezinde saiasatkerdiń densaýlyǵy kúrt nasharlap, ushaq Omby áýejaiyna shuǵyl qonýǵa májbúr bolǵan. Jedel járdem kóligi saiasatkerdi qoný alańynan alyp ketken. Saiasatkerdi aýrýhananyń jan saqtaý bólimine jatqyzyp, oǵan ókpeni jasandy jeldetý apparatyn qosqan.
Saiasatkerdiń jaqtastary onyń ýlanǵan bolýy múmkin ekenin aitady. Iarmyshtyń sózinshe, Navalnyi Tomsk áýejaiyndaǵy kofehanada bir kese qara shai ishken.
Navalnyi aýrýhanaǵa túsken soń Frantsiia prezidenti Emmanýel Makron jáne Germaniia kantsleri Angela Merkel reseilik oppozitsionerdi Eýropada emdeýge kómektesýge daiyn ekenin habarlady. 12 tamyz kúni Germaniia Navalnyidy alyp ketý úshin Ombyǵa arnaiy meditsinalyq ushaq jiberdi. Alaida Omby aýrýhanasy saiasatkerdiń ahýaly tasymaldaýǵa jaramaidy dep qarsylyq tanytty.
Saiasatkerdiń áieli Iýliia Navalnaia Ombydaǵy kúieýi jatqan №1 aýrýhanaǵa senbeitinin aityp, olar "Aleksei aǵzasyndaǵy himiialyq zattyń joǵalyp ketkenin kútip otyr" dep aitqan.
Sol kúni aýrýhana basshylyǵy Navalnyidy Germaniiaǵa alyp ketýge ruqsat berdi.
Omby dárigerleri saiasatkerdiń aǵzasynda «ýlaityn zattar tabylmady» dep, aǵzadaǵy «zat almasý buzylǵan» degen diagnoz qoidy. Navalnyidyń jeke dárigeri Anastasiia Vasileva Omby aýrýhanasynyń qorytyndysyn teristedi. Onyń sózinshe zat almasýynyń buzylýy diagnozǵa jatpaidy, ol jai ǵana adamnyń jai-kúii sanalady. Vasilevanyń aitýynsha, 20 tamyz kúni saiasatkerdiń qanyndaǵy qant deńgeii qalypty bolǵan.
Navalnyidy emdeýge Germaniiadaǵy "Sharite" klinikasy niet bildirdi.
44 jastaǵy Aleksei Navalnyi Reseidegi eń tanymal oppozitsiialyq saiasatker sanalady. Ol Máskeý meri jáne Resei prezidenti sailaýlaryna túspek bolyp, biliktiń kedergilerine tap bolǵan. Tek 2013 jyly ǵana Máskeý meri sailaýyna tolyq qatysty, biraq jeńe almady. Osydan keiin Kreml saiasatkerdi sailaý dodalaryna qatysýǵa múmkindik bermedi.
Saiasatker Resei antikorrýptsiialyq qoryn quryp, eldegi oligarhtar men saiasi elitanyń jasyryn bailyǵyn áshkereleýmen ainalysyp keldi. Onyń derekti filmderin áleýmettik jelide milliondaǵan adam kórdi. Al ol uiymdastyrǵan saiasi sherýlerge ondaǵan myń adam jinalatyn.
Navalnyi keiingi on jylda birneshe ret qamaýǵa alynyp, bas-aiaǵy 100 kúnnen astam túrmede otyrǵan. Oǵan birneshe ret shabýyl da jasalǵan.
2017 jyly qaskóiler onyń betine jasyl tústi antiseptik shashqan. Saldarynan Navalnyidyń kózi kúiip qalǵan.
