Kóleńkeli ekonomika máselesin sheship alsaq, ashyqtyq arqyly ekonomikamyzdyń damý úrdisin kórer edik. QR Májilisiniń depýtaty Omarhan Óksikbaev Memleket basshysynyń búgingi Joldaýyna qatysty osyndai pikir bildirdi, dep habarlaidy QazAqparat.
«Memleket basshysy ekonomikamyzda kóleńkeli ekonomikanyń úlesi úlken ekenin aityp ótti. Ol ekonomikamyzdyń úshten biri - kóleńkeli ekonomika ekenine, onyń qaýip-qaterine jáne sybailas jemqorlyqqa ákep otyrǵanyna basa nazar aýdardy. Ol quqyq qorǵaý organdarynyń basty jumysy - kóleńkeli ekonomikamen kúres bolýy kerektigin aitty. Bul - óte durys tapsyrma. Osy máseleni sheship alsaq, ashyqtyq arqyly ekonomikamyzdyń damý úrdisin kórer edik», - deidi QR Májilisiniń depýtaty Omarhan Óksikbaev.
Ol Memleket basshysynyń teńgeni bir qalypqa keltirý máselesin qozǵaǵanyna toqtalyp ótti.
«Teńgeniń turaqsyzdyǵy biznestik investitsiia jasaýǵa umtylystyń joqtyǵyna, sheteldik investorlardyń senimsizdik tanytýyna ákelip otyrǵany belgili. Osy máseleniń bárin der kezinde sheshe alsaq, bul erteńgi kúni teńgemizdiń turaqtanýyna jáne investitsiialyq klimattyń qalypqa kelýine septigin tigizer edi. Sondai-aq, elimizde zań aiasynda qyryqqa jýyq salyq pen túsimder bar ekeni belgili. Memleket basshysynyń tapsyrmasymen ony ońtailandyryp, naqtylap, ekonomikaǵa jumys isteitin jáne biýdjetke óz muqtajyn sheshetin jaǵdai týǵyzý kózdelip otyr», - deidi ol.
