Astana qalalyq sotynda zardap shekken taraptyń advokaty Damir Sandinov aiyptalýshy Malika Muhitovadan 14 mln 753 myń teńge materialdyq shyǵyn óndirýdi surady, dep habarlaidy Sputnik Qazaqstan tilshisi.
Astana qalasy Esil aýdanynyń ekinshi qalalyq sotynda Oljas Súleimenovtiń nemeresi Eskendir Súleimenovtiń ólimi boiynsha sot otyrysy ótip jatyr. Protsess barysynda zardap shekken taraptyń advokaty Damir Sandinov aiyptalýshydan jalpy somasy 14 million 753 myń teńge materialdyq shyǵyn óndirýdi surady.
"Sottalýshy Muhitova jasaǵan qylmys saldarynan mynadai múliktik ziian keltirildi: oqiǵa ornynda janyp ketken 2012 jylǵy mototsikldiń quny 3 million 956 myń teńge, jerleý rásimine ketken shyǵyn 7,124 million teńge, jerleýdi ótkizýmen bailanysty, sondai-aq, sotqa deiingi tergeýge qatysýǵa bailanysty ketken shyǵyn 2, 542 million teńge. Keltirilgen ziiannyń jalpy somasy 14, 752 million teńgeni quraidy", — dedi avdokat.
Eske sala ketsek, belgili aqyn, jazýshy Oljas Súleimenovtiń nemeresi 27 jastaǵy Eskendir Súleimenov Astanada jol apatynan kóz jumǵan edi. Jol apaty Máńgilik el – Kerei Jánibek handar kósheleriniń qiylysynda bolǵan. Jas jigit mototsikl júrgizip kele jatqan. Eskendir Súleimenovti Qyzylorda oblysy ishki ister departamentiniń bastyǵy, politsiia polkovnigi Qairat Muhitovtiń qyzy Malika Muhitova qaǵyp ketken. 29 jastaǵy Malika Muhitova ótken aptada ótken sot otyrysynda marqumnyń ata-anasynan jylap keshirim surady. Óziniń kinásin tolyǵymen moiyndap, zardap shekken tarapqa materialdyq shyǵyndy tóleýge daiyn ekenin málimdedi.
Aitýynsha, kólikti 2012 jyldan beri júrgizedi, alty jyl ishinde birde bir ret jol-kólik oqiǵasyna ushyramaǵan.
Aiyptalýshy "Samuryq-Qazyna" ulttyq kompaniiasynda jumys isteidi, turmys qurmaǵan, buryn sottalmaǵan.
