Astanada Oljas Súleimenovtiń nemeresi, 27 jastaǵy Eskendir Súleimenov qaza tapqan jol apatyna qatysty sot otyrysy jalǵasýda, dep habarlaidy Sputnik Qazaqstan tilshisi.
Qyzylorda oblysy ishki ister departamenti bastyǵynyń qyzy Malika Muhitova 22 maýsym kúni Astanada mototsiklmen kele jatqan 27 jastaǵy Eskendir Súleimenovti kóligimen qaǵyp ketken edi. Oljas Súleimenovtiń nemeresi oqiǵa ornynda jan tapsyrdy.
Jol apatyna qatysty alǵashqy sot otyrysy Astana qalasy Esil aýdanynyń ekinshi qalalyq sotynda 12 qazanda bastaldy. Alǵashqy otyrysqa jábirlenýshi taraptan tek advokat qana qatysqan bolatyn. Bul joly sot otyrysyna marqum Eskendir Súleimenovtiń ákesi de keldi.
Jaýap alý barysynda aiyptalýshy Malika Muhitova jábirlenýshi taraptan jylap keshirim surady.
"Sizderden keshirim suraimyn. Buǵan deiin múmkindik bolǵan joq. Kún saiyn Alladan meni keshirýlerińizdi suraimyn. Men bulai bolǵanyn qalaǵan joqpyn. Sizderge qanshalyqty aýyr ekenin bilemin, bárimiz úshin aýyr. Meni keshirińizder, ótinemin. Shyn aitamyn. Barlyqtaryńyzdan keshirim suraimyn", — dep jylap keshirim surady ol.
Malikanyń aitýynsha, ol jol apaty bolǵan kúni jumystan shyǵyp, úiine bara jatqan. Sol kúni olardy jumystan erte bosatypty.
"Jolshybai Máńgilik el men Kerei men Jánibek handar kóshesiniń qiylysyndaǵy azyq-túlik dúkenine kirdim. Shyqqannan keiin kólikke otyryp, Kerei men Jánibek handar kóshesine burylý úshin sol jaqqa qarai yńǵailana bastadym. Jan-jaǵyma qaradym, eshteńe kóringen joq. Solǵa buryla bastaǵan kezde, oń jaǵymnan bir nárse zý etip, meniń kóligime soǵyldy.
Men shoshyp kettim, dál sol sátte ne bolǵanyn túsinbei de qaldym. Kólikten shyqtym, qarasam, asfaltta bir jigit jatyr. Barlyǵy júgirip keldi, sol kúni óte kóp adam boldy…Jedel járdem shaqyrmaqshy boldym, biraq qasymda turǵan jigit shaqyryp qoiypty", — dedi Malika.
Jol apatynan keiin birden ákesine habarlasqan. Aitýynsha, kólikti 2012 jyldan bastap júrgizedi.
"Oqiǵa ornynda sońyna deiin boldym. Keiin meni ishimdik ishken-ishpegenimdi tekserý úshin alyp ketti. Odan soń jaýap alý úshin bólimshege alyp ketti", — dedi ol.
Malika Muhitova óziniń kinásin tolyǵymen moiyndady.
