Belgili aqyn, Oljas Súleimenovtiń nemeresi Eskendir Súleimenov qaza bolǵan jol apatyna kináli dep tanylǵan Malika Muhitova merziminen buryn bostandyqqa shyqty. Bul týraly Nur-Sultan qalalyq sotynyń baspasóz qyzmetinen málim etti, dep habarlaidy "Ult aqparat".
«Osy jyldyń 23 maýsymynda Baiqońyr aýdandyq №2 sotynyń qaýlysymen sottalǵan Muhitovanyń jazasynyń qalǵan bóligin aýystyrý týraly ótinishi qanaǵattandyrylǵan joq. Nur-Sultan qalalyq sotynyń appeliatsiialyq satysy bul sheshimdi joiyp, bas bostandyǵynan aiyrýdyń ótelmegen bóligi aiyppulǵa aýystyryldy. Qylmystyq kodekstiń 73-babyna sáikes, qylmyspen keltirilgen zalaldy tolyq ótegen ne jazany óteýdiń belgilengen tártibin qaskóilikpen buzbaǵan jaǵdaida, sot jazanyń qalǵan ótelmegen bóligin neǵurlym jeńil jaza túrimen aýystyrýy múmkin. Zańnyń bul talabyn Muhitova oryndady», - delingen taratylǵan aqparatta.
Sottyń málimetinshe, búgingi kúnge deiin ol jazanyń basym bóligin ótegen. Ótelmegen 4 ai 27 kún ǵana qalǵan. Ol jazasyn óteý barysynda ózin tártipti ustap, mekemeniń qoǵamdyq ómirine belsendi qatysqany jáne úlgili tártibi úshin 3 ret yntalandyrylǵan. Túzeý mekemesi de oǵan oń sipattama bergen.
«Nur-Sultan qalasy Esil aýdandyq sotynyń sheshimimen óndirilip alynatyn moraldik ótemaqyny M.Muhitova tolyqtai tóledi. Prokýror men mekeme ókili de sottalýshynyń ótinishhatyn qoldap, jazany neǵurlym jeńil túrimen aýystyrýdy ótindi. Atalǵandardyń negizinde appeliatsiialyq saty Muhitovanyń bas bostandyǵynan aiyr túrindegi jazasyn aiyppulǵa aýystyrdy», - delingen taratylǵan aqparatta.
Eske salaiyq, 2018 jyldyń maýsym aiynda Astanada jol apatynan aqyn Oljas Súleimenovtiń 26 jastaǵy jieni Eskendir Súleimenov mert boldy.
Eskendir tizgindegen mototsikl qiylysqa shyqqan kólikke soǵyldy. Arada kóp ýaqyt ótpei Astana qalalyq Ishki ister departamenti apatqa sebepker bolýy múmkin «Hyundai» avtokóliginiń iesi, 29 jastaǵy Malika Muhitovaǵa qatysty tergeý amaldary júrip jatqanyn habarlady.
Keiinnen M.Muhitova Qyzylorda oblystyq IID (Politsiia departamentiniń) bastyǵynyń qyzy ekeni anyqtaldy.
Ol 2 jylǵa bas bostandyǵynan airylǵan bolatyn.
