Oljas Súleimenovtiń taiaýda jol apatynan qaza tapqan nemeresi Eskendirdiń qalyńdyǵy Alýa Bekqoja Tengrinews.kz tilshisine bergen suhbatynda mototsikl satyp alýǵa qarsy bolǵanyn aityp berdi. Onyń ústine, aitýynsha, jigittiń ata-anasy da eki dóńgelekti kólikke qarsy bolypty. Al keibir týysy mototsikl satyp alǵanynan da beihabar bolyp shyqty. Alaida Eskendirdi baik satyp alý oiynan eshkim qaitara almapty.
"Eskendir áldenege qadam bassa, sońyna deiin barady. Burynnan mototsikl satyp alǵysy kelgen edi. Bala kezinen armandaǵan. Mototsikldi jaqsy kórmeitinimdi, qalamaitynymdy aittym. Tipti "Ne men, ne mototsikliń" dep te aitqan kezderim boldy. Ata-anasy da qarsy boldy, kei týystary tipti bilmedi. Mundai jaǵdaiǵa tap bolmaǵanda bir-eki jyl aidap, ony tastar edi", - deidi Alýa.
Qyz Eskendirmen jaqyn dosy Sanjar arqyly Parijdegi barda tanysqanyn aityp berdi. Jastar kóp ýaqyt dos bolyp, al jarty jyl buryn ekeýi sezimin bildirgen.
"Únemi birge bolǵymyz keletin. Kezdese bastaǵan soń birneshe kún ótkende úilengisi keletinin aitty. Eki ai buryn usynys jasady. Otbasylarymyzdy tanystyrdyq. Jazda úilený toiyn ótkizýdi josparladyq. Óte jarqyn, qaiyrymdy edi, erekshe edi, óte jomart, adamdardyń boiynan tek jaqsylyqty kóre biletin. Jaǵymsyz qasietterin baiqasa kóńil bildirmei, munyń ár adamnyń ózine ǵana bailanysty ekenin aitatyn", - deidi qyz.
Alýa súiiktisiniń qazasy jaily jumys ýaqytynda bilipti. Sońyna deiin ázil dep oilapty.
"Munyń aqiqat ekenin ony keshe jerlep qaitqanymyzdan keiin túsindim. Ólim týraly sýyq habar kelgende jumysta edim. Shoýrýmda jumys isteimin, barlyǵy frantsýzsha sóileidi. Birden tilim bailanyp, ne bolǵanyn túsindire almai, ne úshin jylaǵanymdy da aitpadym. Denem dirildep ketti. Dereý úige qaitýym kerektigin túsindim. Esimnen tanyp qalatynymdy sezdim. Áli kúnge sene alar emespin. Men súigen adam oqiǵadan 20-30 minýt buryn menimen hat almasqan. Sońǵy habarlamamdy ol sol kúii oqymai ketti", - deidi Alýa.
Qyzdyń aitýynsha, Eskendir jyldyń sońyna deiin nekelesýdi josparlaǵan. Alýanyń aitýynsha, jigit jol qozǵalysy erejesin buzbaityn, salmaqty júrgizetin.
"Ol óte baiaý júretin. Tipti kólikte otyrǵanda da maǵan nazar aýdarmaýǵa tyrysatyn. Baǵdarshamda turǵanda ózge juptar qol ustasyp, súiisedi deitinmin, al ol "Sen kólikte otyrsyń, meniń seniń qaýipsizdińe jaýaptymyn" deitin. Ol "ushyp" júrdi degenge senbeimin. Ómirge qushtar edi, minýttyq lázzat úshin janyn bulai qaýipke tikti degenge senbeimin", - deidi Alýa Bekqoja.
Eske salaiyq, Oljas Súleimenovtiń nemeresi Eskendirdiń qaza tapqan jol apaty Astanada 22 maýsymda Máńgilik el men Kerei, Jánibek handar dańǵylynyń qiylysynda bolǵan edi. Keiin politsiia tergeý jumystary jaily aityp bergen.
