ولجاس سٷلەيمەنوۆتٸڭ تاياۋدا جول اپاتىنان قازا تاپقان نەمەرەسٸ ەسكەندٸردٸڭ قالىڭدىعى الۋا بەكقوجا Tengrinews.kz تٸلشٸسٸنە بەرگەن سۇحباتىندا موتوتسيكل ساتىپ الۋعا قارسى بولعانىن ايتىپ بەردٸ. ونىڭ ٷستٸنە, ايتۋىنشا, جٸگٸتتٸڭ اتا-اناسى دا ەكٸ دٶڭگەلەكتٸ كٶلٸككە قارسى بولىپتى. ال كەيبٸر تۋىسى موتوتسيكل ساتىپ العانىنان دا بەيحابار بولىپ شىقتى. الايدا ەسكەندٸردٸ بايك ساتىپ الۋ ويىنان ەشكٸم قايتارا الماپتى.
"ەسكەندٸر ەلدەنەگە قادام باسسا, سوڭىنا دەيٸن بارادى. بۇرىننان موتوتسيكل ساتىپ العىسى كەلگەن ەدٸ. بالا كەزٸنەن ارمانداعان. موتوتسيكلدٸ جاقسى كٶرمەيتٸنٸمدٸ, قالامايتىنىمدى ايتتىم. تٸپتٸ "نە مەن, نە موتوتسيكلٸڭ" دەپ تە ايتقان كەزدەرٸم بولدى. اتا-اناسى دا قارسى بولدى, كەي تۋىستارى تٸپتٸ بٸلمەدٸ. مۇنداي جاعدايعا تاپ بولماعاندا بٸر-ەكٸ جىل ايداپ, ونى تاستار ەدٸ", - دەيدٸ الۋا.
قىز ەسكەندٸرمەن جاقىن دوسى سانجار ارقىلى پاريجدەگٸ باردا تانىسقانىن ايتىپ بەردٸ. جاستار كٶپ ۋاقىت دوس بولىپ, ال جارتى جىل بۇرىن ەكەۋٸ سەزٸمٸن بٸلدٸرگەن.
"ٷنەمٸ بٸرگە بولعىمىز كەلەتٸن. كەزدەسە باستاعان سوڭ بٸرنەشە كٷن ٶتكەندە ٷيلەنگٸسٸ كەلەتٸنٸن ايتتى. ەكٸ اي بۇرىن ۇسىنىس جاسادى. وتباسىلارىمىزدى تانىستىردىق. جازدا ٷيلەنۋ تويىن ٶتكٸزۋدٸ جوسپارلادىق. ٶتە جارقىن, قايىرىمدى ەدٸ, ەرەكشە ەدٸ, ٶتە جومارت, ادامداردىڭ بويىنان تەك جاقسىلىقتى كٶرە بٸلەتٸن. جاعىمسىز قاسيەتتەرٸن بايقاسا كٶڭٸل بٸلدٸرمەي, مۇنىڭ ەر ادامنىڭ ٶزٸنە عانا بايلانىستى ەكەنٸن ايتاتىن", - دەيدٸ قىز.
الۋا سٷيٸكتٸسٸنٸڭ قازاسى جايلى جۇمىس ۋاقىتىندا بٸلٸپتٸ. سوڭىنا دەيٸن ەزٸل دەپ ويلاپتى.
"مۇنىڭ اقيقات ەكەنٸن ونى كەشە جەرلەپ قايتقانىمىزدان كەيٸن تٷسٸندٸم. ٶلٸم تۋرالى سۋىق حابار كەلگەندە جۇمىستا ەدٸم. شوۋرۋمدا جۇمىس ٸستەيمٸن, بارلىعى فرانتسۋزشا سٶيلەيدٸ. بٸردەن تٸلٸم بايلانىپ, نە بولعانىن تٷسٸندٸرە الماي, نە ٷشٸن جىلاعانىمدى دا ايتپادىم. دەنەم دٸرٸلدەپ كەتتٸ. دەرەۋ ٷيگە قايتۋىم كەرەكتٸگٸن تٷسٸندٸم. ەسٸمنەن تانىپ قالاتىنىمدى سەزدٸم. ەلٸ كٷنگە سەنە الار ەمەسپٸن. مەن سٷيگەن ادام وقيعادان 20-30 مينۋت بۇرىن مەنٸمەن حات الماسقان. سوڭعى حابارلامامدى ول سول كٷيٸ وقىماي كەتتٸ", - دەيدٸ الۋا.
قىزدىڭ ايتۋىنشا, ەسكەندٸر جىلدىڭ سوڭىنا دەيٸن نەكەلەسۋدٸ جوسپارلاعان. الۋانىڭ ايتۋىنشا, جٸگٸت جول قوزعالىسى ەرەجەسٸن بۇزبايتىن, سالماقتى جٷرگٸزەتٸن.
"ول ٶتە باياۋ جٷرەتٸن. تٸپتٸ كٶلٸكتە وتىرعاندا دا ماعان نازار اۋدارماۋعا تىرىساتىن. باعدارشامدا تۇرعاندا ٶزگە جۇپتار قول ۇستاسىپ, سٷيٸسەدٸ دەيتٸنمٸن, ال ول "سەن كٶلٸكتە وتىرسىڭ, مەنٸڭ سەنٸڭ قاۋٸپسٸزدٸڭە جاۋاپتىمىن" دەيتٸن. ول "ۇشىپ" جٷردٸ دەگەنگە سەنبەيمٸن. ٶمٸرگە قۇشتار ەدٸ, مينۋتتىق لەززات ٷشٸن جانىن بۇلاي قاۋٸپكە تٸكتٸ دەگەنگە سەنبەيمٸن", - دەيدٸ الۋا بەكقوجا.
ەسكە سالايىق, ولجاس سٷلەيمەنوۆتٸڭ نەمەرەسٸ ەسكەندٸردٸڭ قازا تاپقان جول اپاتى استانادا 22 ماۋسىمدا مەڭگٸلٸك ەل مەن كەرەي, جەنٸبەك حاندار داڭعىلىنىڭ قيىلىسىندا بولعان ەدٸ. كەيٸن پوليتسييا تەرگەۋ جۇمىستارى جايلى ايتىپ بەرگەن.
