Elimizdiń eń iri ulttyq kompaniialary biznes transformatsiiasy kezeńinen ótýde. Makroekonomika sarapshysy Oljas Qudaibergenov depýtattar men jýrnalisterge úderister boiynsha óz paiymdaýlaryn bildirdi.
«Jalpy alǵanda, transformatsiia boiynsha da, «Samuryq-Qazyna» týraly da, syn nemese jaqsy nárseler aitylýy múmkin. Ár kompaniianyń óz qatelikteri bolady. Sońǵy 5-6 jylda osy kompaniialardyń hal-ahýalyn jetkilikti dárejede bilemin, onyń ishinde qarjylyq jaǵdaidan da habardarmyn, sondyqtan-da, keibir ózgeristerdiń kele jatqanyn aitýym kerek. Enshiles qurylymdarynda da ahýal ózgerýde, qurylymdardaǵy býyndar sany qysqartylýda», - deidi Qudaibergenov.
«Samuryq-Qazyna» basshylyǵy málimdegendei, transformatsiia aiasynda qor qurylymy men onyń enshiles kompaniialary tolyqtai ózgertiledi. Korporativtik ortalyqtyń ózi de yqshamdala túsedi, basqarý deńgeileri tórtke deiin, basqarýshy direktorlar sany on altydan toǵyzǵa deiin qysqartyldy, al kadrlyq quram 40 paiyzǵa jańartyldy. Al qor tobyna kiretin ulttyq kompaniialar tiginen integratsiialanǵan bolýy kerek, jáne bas kompaniia men óndiris arasyndaǵy barlyq artyq býyndar qysqartylýy qajet.
«Másele barlyq sýbholdingter týraly bolyp tur, olar «QMG qaita óńdeý jáne marketing», «QazTransGaz». «QazTransOil» óndiristik kompaniia retinde qalady, biraq strategiialyq fýnktsiialary «QazMunaiGaz» bas kompaniiasyna beriletin bolady», - dep «QazMunaiGaz UK» AQ basshysy Saýat Myńbaev jýrnalisterge málimdedi. Sonymen qatar, qysqartýlar tek ákimshilik-basqarýshy qyzmetkerlerge ǵana áser etetindigin kompaniiada ýáde etýde.
Qordyń kadrlyq saiasatyndaǵy ózgerister laýazymdarǵa qoiylatyn talaptar men qyzmetkerlerdi irikteý júiesine áser etti. Ol anaǵurlym ashyǵyraq bola tústi, qordyń bos oryndary veb-saitynda jáne áleýmettik jelilerde jariialanady. Oljas Qudaibergenov «Samuryq-Qazyna» Sarapshylar keńesinde sóilegen sózinde jańa erejelerge baǵa berdi.
«Qazaqstan - shaǵyn el, «Samuryqqa» jumysqa ornalasý protsessi týraly óte kóp adamnyń pikirlerine qarap, oń kózqaras bildirgenderdiń sany teris pikirdegilerden basymyraq degen janama bailam jasai alamyn. Jalpy alǵanda, transformatsiia baǵdarlamasynyń ózi «Samuryq-Qazynadaǵy» barlyq ózgeristerge jaǵymdy ún qosady», - dedi sarapshy.
Esterińizge sala keteiik, «Samuryq-Qazyna» ulttyq ál-aýqat qorynda transformatsiia 2014 jyldyń sońynda bastaldy. Osy ýaqyt ishinde qor jáne onyń quramyna kiretin ulttyq kompaniialardyń operatsiialyq modelderi men uiymdyq qurylymdary qaita qaraldy. Ústimizdegi jyldyń qarasha aiynda Qazatomónerkásip pen Qazposhtanyń transformatsiia jobasynyń portfelderi maquldandy. QTJ, QMG, «Samuryq-Energo» jáne «KEGOC» jobalarynyń portfelderi 2016 jyldyń sońyna deiin bekitiletin bolady.
«Samuryq-Qazyna» ókilderiniń aitýynsha, eldgi JIÓ úshin transformatsiialaýdan keletin sandyq jáne sapalyq paidanyń ekonomikalyq tiimdiligi aldyn-ala baǵalaýlar boiynsha, aldaǵy bes jylda qarjylyq turǵydan alǵanda 1 trln astam teńgeni quraidy.
