Forbes Kazakhstan 2026 jylǵy Qazaqstandaǵy eń yqpaldy 50 kásipkerdiń reitingin jariialady. Biyl tizimniń birinshi ornyna Kaspi.kz direktorlar keńesiniń tóraǵasy Viacheslav Kim shyqty, dep habarlaidy ult.kz.
Bul – Forbes Kazakhstan-nyń yqpaldy kásipkerler reitingin 16-ret jariialaýy. Tizim kásipkerlerdiń qarjylyq jaǵdaiymen qatar, olardyń el ekonomikasyndaǵy yqpalyna, iri kompaniialardy basqarýyna, investitsiialyq jobalaryna jáne qoǵamdyq qyzmetine qarai jasalǵan.
Basylymnyń málimetinshe, sońǵy bir jylda bank, taý-ken óndirisi, metallýrgiia, qurylys jáne kólik-logistika salalaryndaǵy iri mámileler men ózgerister kásipkerlerdiń reitingtegi pozitsiialaryna áser etken.
Alǵashqy bestikte kimder bar?
1-oryn – Viacheslav Kim, 57 jasta.
Kaspi.kz direktorlar keńesiniń tóraǵasy jáne kompaniianyń 20,06% úlesine ielik etetin aktsioner. 2025 jyldyń qorytyndysy boiynsha Kaspi.kz-tiń jiyntyq tabysy 4,05 trln teńge, taza paidasy 1,07 trln teńge bolǵan.
Kimniń aktivteri qarjy sektorymen shektelmeidi. Ol United Group Alatau, «Alseko» jáne Magnum Cash&Carry siiaqty kompaniialarǵa qatysty aktivterge ie.
2026 jyly kásipker JV Holding Ltd. kompaniiasyn ielendi. Holding Jusan Mobile kompaniiasyn baqylaidy. Qyrkúiekte bailanys operatory QMobile ataýyna kóshetinin málimdedi.
Kimniń yqpalyn arttyrǵan jobalardyń biri – Almaty oblysyndaǵy Alataý qalasyn damytý. Qyrkúiekte ol qalada bilim berý, ǵylymi zertteý jáne venchýrlyq jobalarǵa arnalǵan AÑSA HUB ortalyǵyn qurý josparyn jariialady. Jobaǵa 100 mln dollarlyq endaýment-qor qalyptastyrý kózdelgen.
2-oryn – Bolat Ótemuratov, 68 jasta.
Onyń biznesi bank, telekommýnikatsiia, jyljymaityn múlik, bilim berý jáne qonaqúi salalaryn qamtidy.
Kásipker ForteBank aktsiialarynyń 91,43%-yna ielik etedi. Onyń aktivteriniń qatarynda Beeline jáne IZI brendterimen jumys isteitin «KaR-Tel», The Ritz-Carlton Astana, Rixos Borovoe jáne The Carlton Moscow qonaqúileri bar.
Ótemuratov Narxoz University-ge de ielik etedi. Onyń qory Astana men Almatydaǵy Haileybury mektepteriniń kapitalyna qatysady.
3-oryn – Timýr Qulybaev, 60 jasta.
Kásipker jubaiy Dinara Qulybaevamen birge «Almeks» holdingtik toby arqyly Qazaqstan Halyq bankiniń 61,91% aktsiiasyn baqylaidy.
Onyń kompaniialary munai-gaz, kólik-logistika, meditsina, bólshek saýda jáne jyljymaityn múlik salalarynda jumys isteidi. Qulybaevtyń aktivteri qatarynda QazaqOil jáne Gas Energy janarmai quiý jelilerindegi, PTC Holding pen SilkwayTransit kompaniialaryndaǵy úlesteri bar.
4-oryn – Nurlan Smaǵulov, 61 jasta.
Astana Group kompaniiasynyń negizin qalaýshynyń biznesi avtomobil saýdasy, mashina jasaý, qurylys, saýda ortalyqtary jáne qarjy tehnologiialary salalaryn qamtidy.
Astana Group quramyna Astana Motors, MEGA saýda jáne oiyn-saýyq ortalyqtary jáne Mycar Group kiredi.
2025 jyly Almatyda Astana Motors Manufacturing Kazakhstan mýltibrendti avtomobil zaýyty iske qosyldy.
Smaǵulov mádeniet salasyna da investitsiia salyp keledi. 2025 jyly Almatyda onyń bastamasymen Ortalyq Aziiadaǵy alǵashqy jeke zamanaýi óner mýzeii – Almaty Museum of Arts ashyldy.
5-oryn – Shahmurat Mýtálip, 36 jasta.
Integra Construction KZ kompaniiasynyń benefitsiarlyq iesi temirjol, avtomobil joldary jáne infraqurylym nysandarynyń qurylysy men jóndeý salasynda jumys isteidi.
2026 jyly onyń qatysýymen ERG aktsiialarynyń 39,3%-yn satyp alý mámilesi jasaldy.
Mýtálip Qazaqstan boks federatsiiasyn basqarady, sondai-aq Ulttyq olimpiada komitetiniń halyqaralyq yntymaqtastyq jónindegi vitse-prezidenti. Biyl ol Shymkenttiń «Ordabasy» fýtbol klýbyn satyp aldy.
Alǵashqy ondyqta taǵy kimder bar?
Timýr Týrlov, 38 jasta – Freedom Holding Corp. negizin qalaýshy jáne negizgi aktsioneri.
Nurlan Artyqbaev, 51 jasta – Qazaq Stroy jáne Exclusive Qurylys kompaniialarynyń iri aktsioneri.
Andrei Lavrentev, 47 jasta – Allur tobynyń iri aktsioneri jáne Qarmet kásipornynyń baqylaýshysy.
Aidyn Rahymbaev, 54 jasta – BI Group investitsiialyq-qurylys holdinginiń aktsioneri.
Vladimir Kim, 65 jasta – KAZ Minerals kompaniiasynyń aktsioneri.
Reitingke tórt jańa kásipker endi
Biyl Forbes Kazakhstan reitingine tórt kásipker alǵash ret kirdi. Olar – Shahmurat Mýtálip, Nurlan Artyqbaev, Qudrat Shamiev jáne Almaz Álsenov.
Qudrat Shamiev reitingte 19-orynǵa jaiǵasty. Ol «Eýraziialyq top» kompaniiasynyń bas direktory.
Almaz Álsenov 40-orynda tur. Ol Shveitsariiada ornalasqan Harvest Group halyqaralyq kompaniiasynyń negizin qalaǵan. Qazaqstanda kásipker quny 1,4 mlrd dollar bolatyn Harvest Agro jobasyn júzege asyryp jatyr. Joba 300 myń gektarǵa deiin sýarmaly jerdi qamtýdy kózdeidi.
Sonymen qatar Álsenov Qazaqstanda Paris Saint-Germain klýbynyń litsenziiasy boiynsha PSG Academy Kazakhstan fýtbol akademiiasyn ashýdy josparlap otyr. Alǵashqy ortalyq Astanada ornalasady.
Eń yqpaldy 50 kásipkerdiń tolyq tizimi:
11. Shýhrat Ibragimov – Eurasian Resources Group kompaniiasynyń bas atqarýshy direktory. Taý-ken ónerkásibi men qarjy salasyndaǵy kásipker.
12. Baqytbek Baiseiitov – Bank TsentrKredittiń negizgi aktsioneri jáne direktorlar keńesiniń tóraǵasy.
13. Daniiar Ábilǵazin – QazaqOil, Sinooil jáne Gas Energy janarmai quiý jelilerinde, sondai-aq logistikalyq kompaniialarda úlesi bar kásipker.
14. Aleksandr Belovich – Bazis-A qurylys korporatsiiasynyń negizin qalaýshy. Qazaqstanda jáne shetelde qurylys jobalaryn júzege asyrady
15. Edýard Ogai – Kazakhmys Copper jáne Kazakhmys Coal kompaniialarynyń aktsioneri. Metall jáne kómir óndirý salasynda jumys isteidi.
16. Aidan Káribjanov – Visor Kazakhstan kompaniiasynyń iri aktsioneri. Jel energetikasy men investitsiialyq jobalardy damytady.
17. Armanjan Baitasov – Forbes Kazakhstan jáne basqa da aqparat quraldary kiretin mediakompaniialardyń teń iesi. Telekommýnikatsiia men jyljymaityn múlik salasynda da biznesi bar.
18. Dinmuhamed Ydyrysov – "Qazaqstandyq kommýnaldyq júieler" holdingin baqylaidy. Energetika, taý-ken ónerkásibi jáne basqa da salalarǵa investitsiia salady.
19. Qudrat Shamiev – ERG tobynyń Qazaqstandaǵy kásiporyndaryn basqaratyn "Eýraziialyq top" kompaniiasynyń bas direktory.
20. Qairat Boranbaev – Almatynyń "Qairat" fýtbol klýbynyń negizgi iesi. Esentai Mall, Esentai Tower jáne basqa da kásiporyndarda úlesi bar.
21. Oleg Novachýk – KAZ Minerals halyqaralyq taý-ken kompaniiasynyń direktorlar keńesiniń tóraǵasy.
22. Qanat Kópbaev – Kusto Group kompaniiasynyń aktsioneri. Qurylys, qurylys materialdary óndirisi jáne logistika baǵyttaryn damytady.
23. Erkin Tátishev – Kusto Group kompaniiasynyń iri aktsioneri jáne direktorlar keńesiniń tóraǵasy. Aýyl sharýashylyǵy, qurylys, munai-gaz jáne saýda salasynda jumys isteidi.
24. Farrýh Mahmýdov – Orbis Kazakhstan kompaniialar tobynyń negizin qalaýshy. Avtomobil saýdasy, aýyl sharýashylyǵy, munai servistik qyzmeti jáne qurylys salalarynda biznesi bar.
25. Sergei Kan – Qazaq munai jáne gaz institýtynyń iesi. Energetika men ónerkásip salalaryna investitsiia salady.
26. Keńes Raqyshev – Fincraft Group holdinginiń iesi. Munai-gaz, taý-ken óndirisi jáne qarjy salalarynda aktivteri bar.
27. Serikjan Seiitjanov – "Ońtústik" kompaniialar tobynyń negizin qalaýshy. Munai óndirý, tsement óndirisi, himiia jáne qonaqúi biznesimen ainalysady.
28. Qairat Májibaev – RG Brands kompaniiasynyń negizgi aktsioneri. Azyq-túlik pen sýsyn óndirisi salasynda jumys isteidi.
29. Berik Qaniev – Lancaster Group kompaniiasynyń aktsioneri. Munai servistik qyzmeti, bilim berý jáne basqa da investitsiialyq jobalarǵa qatysady.
30. Raiymbek Batalov – Raimbek Group holdinginiń iesi. Azyq-túlik, sýsyn óndirisi jáne investitsiia salasynda jumys isteidi.
31. Arsen Tomskii – álemniń 48 elinde jumys isteitin inDrive halyqaralyq tehnologiialyq kompaniiasynyń negizin qalaýshy.
32. Erlik Balfanbaev – Alina qurylys materialdary kompaniialar tobynyń negizin qalaýshy. Almaty mańyndaǵy Oi-Qaragai taý kýrortynyń iesi.
33. Eldar Ábdirazaqov – Centras Group kompaniiasynyń negizin qalaýshy. Saqtandyrý, qarjy jáne meditsina salasynda jumys isteidi.
34. Edýard Kim – Technodom turmystyq tehnika jáne elektronika dúkenderi jelisiniń negizin qalaýshy.
35. Qairat Itemgenov – Aqniet Group kompaniiasynyń iri aktsioneri. Europharma jáne ArzanPharm dárihanalar jelisin, sondai-aq logistikalyq jobalardy damytady.
36. Vladimir Denisov – SCAT áýe kompaniiasynyń negizgi aktsioneri jáne prezidenti.
37. Marǵulan Seisembai – SEIMAR kompaniiasynyń iesi. Bilim berý, aýyl sharýashylyǵy jáne investitsiialyq jobalarǵa qatysady.
38. Ivan Saýer – "Rodina" agrofirmasynyń negizgi iesi. Aýyl sharýashylyǵy jáne astyq óndirisi salasynda jumys isteidi.
39. Almas Sultanǵazin – Sulpak jáne Alser turmystyq tehnika dúkenderi jelileriniń iri aktsioneri.
40. Almaz Álsenov – Harvest Group halyqaralyq agrokompaniiasynyń negizin qalaýshy. Qazaqstanda iri agroónerkásip keshenin damytýda.
41. Marat Juman – 30 elde jumys isteitin Atasu Group kólik-logistika holdinginiń negizin qalaýshy.
42. Raýan Kenjehanuly – Bilim Group bilim berý tehnologiialary kompaniiasynyń negizin qalaýshy. Qazaqsha Vikipediiany damytýǵa jáne ulttyq til jobalaryna úles qosqan.
43. Aidarbek Qojanazarov – Alto Logistics kompaniiasynyń teń iesi. Temirjol tasymaly salasynda jumys isteidi, Respublica partiiasynyń tóraǵasy.
44. Marat Sársenov – "Istkomtrans" logistikalyq kompaniiasyn baqylaidy. Temirjol tasymaly jáne aýyl sharýashylyǵy salasynda biznesi bar.
45. Erlan Súleimenov – "OLIMP" klinikalyq-diagnostikalyq zerthanalar jelisiniń negizin qalaýshy jáne bas direktory.
46. Aiǵazy Qusaiynov – Halyqaralyq bilim berý korporatsiiasynyń iesi. Onyń quramyna QazBSQA, Qazaq-Amerika ýniversiteti jáne basqa da oqý oryndary kiredi.
47. Gaýhar Qapparova – Lancaster Group kompaniiasynyń aktsioneri. Munai servistik qyzmeti, taý-ken ónerkásibi jáne saýda salalarynda aktivteri bar.
48. Ǵalymjan Esenov – aýyl sharýashylyǵy, bilim berý jáne jyljymaityn múlik salalarynda biznesi bar kásipker. "Almaty marafonyn" uiymdastyratyn qordyń negizin qalaýshy.
49. Eldar Sársenov – Nurbanktiń negizgi aktsioneri jáne direktorlar keńesiniń tóraǵasy.
50. Almas Qudaibergen – Centrasia Group kompaniiasynyń negizin qalaýshy. Munai servistik qyzmetteri men ónerkásip salasynda jumys isteidi.
Eske salaiyq, buǵan deiin Qazaqstandaǵy eń yqpaldy 25 áiel týraly jazdyq.
