Úkimet basshysy Oljas Bektenov «Jaily mektep» jobasyn iske asyrýda belgili bir shikilikter bar ekenin aitty, dep habarlaidy "Ult aqparat" Úkimettiń baspasóz qyzmetine silteme jasap.
Oljas Bektenov memleket basshysy ulttyq jobany iske asyrý barysyn, ásirese jer ýchaskelerin bólý jáne jobalyq qujattamany keshiktirý máselelerin synǵa alǵanyn jáne Úkimetke barlyq problemany tez arada joiýdy tapsyrǵanyn jetkizdi.
«Samuryq-Qazyna» qorynyń tarapynan merdiger uiymdardyń jumysyna tiisti baqylaý jasalmai otyr. Sonymen qatar jekelegen óńirlerde áli kúnge deiin jer ýchaskelerin rásimdeý jáne injenerlik-kommýnikatsiialyq infraqurylymmen qamtamasyz etý máseleleri sheshilmei keledi, - dedi Úkimet basshysy.
Bektenov óńir ákimderi tarapynan bolǵan formalizm men máseleni ortalyqqa ysyra salý áreketi jobalaý jáne qurylys jumystarynyń keshigýine ákep soqtyrǵanyn alǵa tartty. Saldarynan obektiler ýaqytynda tapsyrylmai qala ma degen qaýip te joq emes.
Úkimet basshysy, sondai-aq, qurylys materialdaryn, jabdyqtar men jihazdardy satyp alý isine barynsha otandyq óndirýshilerdi tartý qajettigin aitty. Jaily mektepterdiń qurylysy Úkimettiń qatań baqylaýynda bolatynyn jetkizdi.
Memleket basshysynyń jańa formattaǵy mektepter salý týraly tapsyrmasyn oryndaý úshin biz bar kúshimizdi jumyldyryp, tez qimyldaýymyz kerek. Osyǵan bailanysty atalǵan jumysqa tartylǵan barlyq memlekettik organnan naqty is-qimyldardy talap etemin. «Birinshi, «Samuryq-Qazyna» qoryna 1 qyrkúiekke deiin 98 mekteptiń, al osy jyldyń sońyna deiin qalǵan 119 mekteptiń paidalanýǵa berilýin qamtamasyz etýdi tapsyramyn, - dedi ol.
Premer-ministr bul rette jumys sapasy da aqsamaýy keregin nazarǵa aldy.
15 mamyrǵa deiin barlyq jobalaý-smetalyq qujattamany ázirleýdi jáne memlekettik saraptamadan ótkizýdi aiaqtaý qajet. Óńir ákimderi 15 naýryzǵa deiin mektep qurylysyna arnalǵan jer ýchaskelerin rásimdeýge qatysty barlyq problemany sheshýi tiis. Biyl paidalanýǵa beriletin mektepterge baratyn joldar men injenerlik-kommýnikatsiialyq infraqurylymnyń qurylysyn osy jylǵy 1 tamyzǵa deiin aiaqtaý qajet, - dedi Oljas Bektenov.
