Foto: Gov.kz
Ekonomist Aibar Oljaev Qazaqstan ekonomikasy 2025 jyly munai baǵasynyń óspeýine qaramastan, ishki jalpy ónimniń 6,2%-dyq ósimin kórsetip, fenomenaldy nátije tirkegenin málimdedi. Bul – elimiz úshin buryn-sońdy bolmaǵan kórsetkish. Sarapshynyń aitýynsha, dál osyndai ósim 2011 jyly da bolǵan, biraq ol kezde JIÓ-niń artýyna munai baǵasynyń kúrt kóterilýi áser etken. Al mundai kórsetkishke elimiz Úkimettiń tiimdi jumysynyń arqasynda jetip otyr deidi ol.
Aibar Oljaev úshinshi toqsanda týra osy qarqyndy saqtai alsaq, 2025 jyly qazaq ekonomikasy 300 milliard dollardan asatyn bolady dep boljam jasaidy. Bul Vetnammen iyq tiresýge múmkindik beredi, sondai-aq Resei ekonomikasymen 10 ese alshaqtyǵymyz edáýir qysqaryp, 7 ese az bolamyz.
"Biyl biz ekonomikanyń san boiynsha emes, sapa boiynsha óskenin kórdik. Ósim kólik pen logistika (22,7%), qurylys (18,4%), taý-ken ónerkásibi jáne saýda (8,4%), óńdeý ónerkásibi (5,5%) arqyly keldi. Qazaq eli shyn máninde indýstriialanýda. Ekonomika qurylymyndaǵy óńdeý ónerkásibiniń úlesi 2024 jyly 12,2%-ǵa deiin ulǵaiyp ketken. Buryn diversifikatsiia biz úshin qaǵazǵa jazylǵan kúrdeli sóz bolsa, endi jańa formattaǵy menedjer Oljas Bektenov is júzinde diversifikatsiianyń qalai bolatynyn kórsetti", - dep jazdy ol.
Sarapshy jýyq arada Serik Jumanǵarin da qazaq eline ekonomikany tiimdi ósirý baǵdarlamasyn jariialaitynyn atap ótti. Baǵdarlama boiynsha Qazaqstan optimaldy áreket etetin bolady.
"Iaǵni kapital óńdeý, taý-ken ónerkásibi, agroónerkásiptik keshen jáne infraqurylym siiaqty eń perspektivaly salalarǵa nysanaly dáldikpen baǵyttalmaq", - dep jazdy sarapshy.
Aibar Oljaev Oljas Bektenovtyń de ishki transformatsiiasy týraly da sóz etti. Úkimet basshysy birinshi ret jýrnalister aldyna shyǵyp, aýqymdy baspasóz konferentsiiasyn berdi. Eshbir suraqtan qashpai, bárine jaýap berdi.
"Qoǵammen dialog tek jetistikterdi aitýmen ǵana shektelmeidi. Ol sheshýdi qajet etetin názik máselelerdi ashyq talqylaýmen baǵalanady. Mundai ózara áreket etý stili senimdi nyǵaityp, jalǵan aqparat taratý qaýpin azaitady.
Ekonomikanyń ósýimen qatar, Abaiuly da saiasatker retinde jaqsy ósip keledi. Onymen eshkimniń talasa almaityny haq. Úkimet basshysy ekonomikany damytý boiynsha Memleket basshysynyń tapsyrmasyn tolyq jáne sapaly oryndaýda", - dep baǵa berdi Aibar Oljaev.
