Foto:primeminister.kz
Premer-ministr Oljas Bektenov Memleket basshysynyń biylǵy 28 qańtarda ótken Úkimettiń keńeitilgen otyrysynda bergen tapsyrmalaryn iske asyrý máseleleri boiynsha keńes ótkizdi.
Premer-ministrdiń orynbasarlary, ministrler men birqatar uiym basshylyǵy ekonomika salalarynyń ósýin qamtamasyz etý, investorlar úshin zańnamalyq jaǵdailardy jetildirý, sirek jer metaldary óndirisin damytý, iadrolyq klaster qurý, jer qoinaýyn paidalaný salasyn reformalaý, jol jáne kólik-logistikalyq, injenerlik infraqurylymdy jańǵyrtý, «Zań jáne Tártip» qaǵidatyn qamtamasyz etý, tsifrlyq sheshimder men jasandy intellekt engizý, bilim berý jáne meditsinalyq qyzmetter sapasyn odan ári arttyrý jónindegi josparlar týraly baiandady.
Premer-ministr aldaǵy kezeńdegi jumystyń basty baǵyty azamattardyń turmys sapasyn jaqsartýǵa baǵyttalǵan ekonomikanyń ósýin qamtamasyz etý ekenin atap ótti. Úkimet barlyq baǵyt boiynsha jedel sheshimder qabyldap, Prezident tapsyrmalarynyń ýaqtyly iske asyrylýyn qamtamasyz etedi.
«Biz investitsiialardy tartý, salyq-biýdjet saiasatyn jáne jer qoinaýyn paidalaný salasyn reformalaý, elimizdiń básekelestik artyqshylyqtaryn kúsheitý, iskerlik ahýaldy jaqsartý, infraqurylymdyq jáne energetikalyq damý, tsifrlandyrýdyń tutas júiesin jáne halyqty áleýmettik qamsyzdandyrý júiesin qaita qaraý baǵytynda belsendi jumys isteýimiz kerek. Ol úshin Úkimette ókilettikter jetkilikti. Ministrler men ákimder jedel sheshimder qabyldaýǵa jáne qoiylǵan mindetterdi iske asyrýǵa tolyq jaýapty bolýǵa tiis. Memleket basshysy keshe aitqan árbir baǵyt boiynsha naqty nátije, ortalyqta da, jergilikti jerlerde de árbir basshynyń tiimdi jumysy qajet. Investorlardyń naqty máselelerin sheshýmen ainalysyp, áýre-sarsańǵa salmai, kerisinshe – kásipkerlerdiń kelýine, damýyna, zaýyttar, kásiporyndar, óndirister salýyna kómektesý kerek. Árbir basshy muny óz jumysynyń basty qaǵidaty dep bilýi tiis. Tek naqty jumys qajet. Eski, biýrokratiialyq jumys ádisterin, formalizmdi qoldana otyryp, jańa jaǵdailarda oń nátijege qol jetkizý múmkin emes. Memlekettik organdarǵa Memleket basshysy júktegen mindetterdi sapaly oryndaýǵa kóńil bólýdi, basy artyq qazaǵazbastylyqsyz jáne kópke sozbai batyl sharalar qabyldaýdy tapsyramyn. Bizdiń bárimizden naqty nátije kútip otyr», — dep atap ótti Oljas Bektenov.
Premer-ministr biýdjettik tártipti qatań nyǵaitýǵa jáne memlekettik biýdjetti basym baǵyttar boiynsha teńgerimdi bólýge basa nazar aýdara otyryp, jumystyń birinshi kezektegi birqatar baǵytyna nazar aýdardy.
