Foto:primeminister.kz
Qazaqstan Respýblikasynyń Premer-ministri Oljas Bektenov Qytai Halyq Respýblikasyna jumys sapary aiasynda biznes ókilderiniń qatysýymen ótken Qazaqstan-Qytai investitsiialyq dóńgelek ústeline qatysty. Shanhai qalasynda QHR Memlekettik keńesiniń Premeri Li Tsianmen kelissózder ótedi, VII Qytai halyqaralyq import kórmesine qatysý josparlanǵan, dep habarlaidy Ult.kz QR Premer-ministriniń resmi aqparattyq resýrsyna silteme jasap.
Jumys sapardyń basty maqsaty – Qazaqstan Prezidenti Qasym-Jomart Toqaev pen QHR tóraǵasy Si Tszinpin arasyndaǵy ekijaqty taýar ainalymy kólemin ótken jylǵy $41 mlrd deńgeiindegi tarihi rekordtan eki esege arttyrý jónindegi ýaǵdalastyqtardy júzege asyrý.
Dóńgelek ústel jumysyna metallýrgiia, energetika, mashina jasaý jáne avtomobil ónerkásibi, kómir himiiasy, agroónerkásip kesheni, farmatsevtika jáne basqa da salalar boiynsha kóshbasshy kompaniialar ókilderi qatysty.
Ekonomikanyń basym salalarynda birlesken jobalardy damytý perspektivalary qaraldy. Kezdesýge qatysýshylar QR men QHR arasyndaǵy saýda-ekonomikalyq áriptestik artyp kele jatqanyn atap ótti. Búginde Qazaqstanda 5 myńǵa jýyq birlesken kásiporyn tabysty jumys istep keledi.
Qazaqstan-Qytai birlesken iri jobalary qatarynda Camc Engineering kompaniiasymen birlesip kaltsilendirilgen soda óndirý zaýytyn, Tianjin Cement Industry Design and Research Institute-pen «Sastóbe» himiialyq keshenin jáne Yunnan Industrial Explosive Group-pen jarylǵysh zattar óndirý zaýytyn salý jobasy bar. Qýaty 90 myń birlikti quraityn, tolyq shaǵyn torapty qurastyrýǵa negizdelgen CHANGAN, HAVAL, CHERY avtokólikterin shyǵaratyn zaýyt qurylysy aiaqtalýǵa jaqyn. Sondai-aq Geely, Exeed, KAIYI jeńil avtomobilderin óndirý boiynsha 1 myń jumys ornyn qura otyryp, $150 mln somaǵa investitsiialyq kelisim jasaldy. Jobalar joǵary sapaly otandyq ónim óndirýge qabiletti tehnologiialyq kásiporyndar qurýǵa múmkindik beredi. Bul kórsetkishter, eki eldiń biznes-qaýymdastyqtarynyń pikirinshe, ekijaqty áriptestiktiń ornyqtylyǵy men ónimdiligin rastaidy.
Foto:primeminister.kz
QR Úkimetiniń basshysy atalǵan baǵyttaǵy birlesken jumys jalǵasyp jatqanyn, saýda qatynastarynyń qolda bar áleýeti taýar ainalymyn odan ári ártaraptandyrý jáne investitsiialyq ózara is-qimyldy keńeitý keleshegin kórsetetinin atap ótti.
«Búginde eki el arasyndaǵy yntymaqtastyq joǵary qarqynmen damyp keledi. Joǵary deńgeide qoiylǵan mindetke sáikes, biz jaqyn arada ózara saýda kórsetkishterimizdi eki esege arttyrýǵa niettimiz. Qazaqstan men Qytaidyń birlesken investitsiialyq jobalardy júzege asyrýda zor áleýeti bar. Biz ózara is-qimyldyń jańa kókjiekterin ashyp, yntymaqtastyqtyń tiimdiligin birge arttyra alamyz. Buǵan qol jetkizý úshin tranzittik múmkindikterdi keńeitý, ónerkásiptik kooperatsiiany nyǵaitý jáne bizdiń isker toptar arasynda bailanys ornatý boiynsha belsendi jumys júrgizilýi qajet. Qazaqstan Úkimeti áriptestikti keńeitýge jáne memleketterimiz arasynda berik kópir qurýǵa daiyn. Biz investorlarǵa qoldaý kórsetip, bizneske qolaily jaǵdai jasaimyz jáne ár jobanyń tabysty bolýyna yqpal etemiz. Bizdiń birlesken kúsh-jigerimizdiń arqasynda jańa investitsiialyq bastamalar ekonomikanyń naqty sektoryn damytýǵa, ony ártaraptandyrýǵa jáne azamattarymyzdyń ómir súrý sapasyn jaqsartýǵa qýatty serpin beretinine senimdimin», — dep atap ótti Oljas Bektenov.
Premer-ministr ónerkásipti damytý el úshin mańyzdy basymdyq ekenine toqtalyp, qytailyq kompaniialardy qazaqstandyq biznes-qoǵamdastyqpen tyǵyz áriptestikke shaqyrdy.
Óz kezeginde, dialog barysynda Qytaidyń jetekshi kompaniialary ókilderi Qazaqstanǵa strategiialyq jobalardy iske asyrýdaǵy senimdi seriktes retinde qyzyǵýshylyq tanytty.
China Huadian Corporation kompaniiasy direktorlar keńesiniń atqarýshy múshesi Tszý Bin óz sózinde Qazaqstanmen energetika salasyndaǵy, onyń ishinde shyǵaryndylardy azaitý jónindegi yntymaqtastyqty keńeitý týraly; SUN Energy Investment bas direktorynyń mindetin atqarýshy Ian Gochýn Qazaqstandaǵy alǵashqy kómir himiiasy keshenin iske qosý jospary týraly habardar etti; Beijing Jianlong Heavy Industry Group direktorlar keńesiniń tóraǵasy Chjan Chjisian – bolat ónerkásibindegi yntymaqtastyqty damytý týraly; Zijin Mining Group direktorlar keńesiniń tóraǵasy Chen Tszinhe – geologiialyq barlaý jáne sirek jer kenderin óndirý salasyndaǵy jobalardy iske asyrý jospary týraly aitty.
CP Pharmeceutical Group vitse-prezidenti Se Lei – meditsina salasynda klaster qurýǵa investitsiia salý týraly; Beiqi Foton Motor bas direktory Ý Sibin – Qazaqstanda avtomobil jasaý salasyndaǵy óndiristi lokalizatsiialaý týraly; ACRE injenerlik-konsaltingtik kompaniiasy direktorlar keńesiniń tóraǵasy Ian Chjýni tehnologiialar transferti bóligindegi ózara is-qimyl týraly; Sinotruk International bas direktory Chjao Hýa Qazaqstanda joǵary sapaly avtomobil júk tehnikasyn óndirýdi lokalizatsiialaý jospary týraly habarlady.
Foto:primeminister.kz
Darwin Biotech Co., Ltd. direktorlar keńesiniń tóraǵasy Chen Tszianhýei ósimdik sharýashylyǵy salasyndaǵy qazaqstandyq seriktestermen yntymaqtastyqty keńeitý nietimen bólisti; Fujian Hengwang Investment (metallýrgiia) basqarma tóraǵasy Tszen Chjaotszian Jambyl oblysynda ónerkásiptik jobany iske asyrý jospary týraly baiandady.Kezdesý nátijesinde jalpy somasy $2,5 mlrd bolatyn 8 kommertsiialyq kelisimge qol qoiyldy.
«Samuryq-Qazyna Invest» JShS, «QAZAQGAZ AIMAQ» AQ jáne «Goldcard Smart Group Co., Ltd» arasyndaǵy $8 mln somasyna ziiatkerlik júielerdi engizý salasyndaǵy yntymaqtastyq týraly kelisim. Joba Almaty qalasyndaǵy «Alataý» ITP AEA aýmaǵynda komponentterdiń lokalizatsiiasyn eskere otyryp, GoldCard kompaniiasy jetkizetin quramdas bólshekterden gaz eseptegishterin shaǵyn torapty qurastyrýdy kózdeidi;
«Qarmet» AQ men Zhengzhou Coal Mining Machinery Grouop arasyndaǵy kómir ónerkásibine arnalǵan jabdyqtar óndirý salasyndaǵy «Qarmet» AQ kómir departamentiniń shahtalary úshin $70 mln somasyna mehanikalandyrylǵan keshender satyp alý týraly kelisim;
QR Ulttyq ekonomika ministrligi, Qytaidyń Silk Road Fund Co.Ltd. jáne Kazakhstan Investment Development Fund (KIDF) Management Company Ltd. memlekettik investitsiialyq qory arasynda quny $552 mln investitsiialyq yntymaqtastyq negizderin belgileý jónindegi ózara túsinistik týraly memorandým;
«Qarmet» AQ men Xinxing Ductile Iron Pipes Co.,LTD arasyndaǵy $161 mln somasyna Qazaqstan Respýblikasynda qýaty jylyna 200 myń tonna sferalyq grafiti bar beriktigi joǵary shoiynnan jasalǵan qubyrlar shyǵaratyn zaýyt salý týraly kelisim. Ónim Qazaqstanda turǵyn úi-kommýnaldyq júiesiniń nysandaryn salý, jańǵyrtý, rekonstrýktsiialaý, keńeitý jáne jańartý jónindegi jobalarǵa arnalǵan;
«Qarmet» AQ men China Metallurgical Group Corporation arasyndaǵy $1 mlrd somasyna taý-ken jáne metallýrgiia salalarynda uzaq merzimdi jáne keshendi yntymaqtastyq ornatý týraly kelisim;
«Qarmet» AQ men ACRE Coking & Refractory Engineering Consulting Corporation arasyndaǵy $649 mln somasyna koks-himiia óndirisin jańǵyrtý jáne kómir himiiasyn damytý jónindegi strategiialyq jobany iske asyrý týraly kelisim;
«Qarmet» AQ men Nanjing Fiberglass Research & Design arasyndaǵy $30 mln somasyna Temirtaý qalasynda qýaty jylyna 100 myń tonna daiyn ónim bolatyn domna qojdarynan mineraldy jylytqyshtar óndiretin fabrika salý jáne 200 jańa jumys ornyn ashý týraly kelisim;
«Saran Machinery» JShS men Sinotruk International arasyndaǵy $70 mln somasyna KD distribýtsiia jáne qurastyrý salasyndaǵy, tehnologiiany litsenziialaý jáne taýar belgilerin paidalaný boiynsha yntymaqtastyq týraly kelisimder paketi. Olardyń ishinde Saran qalasynda júk jáne arnaiy tehnika óndirý jónindegi jobany iske asyrý týraly Memorandým bar, onyń sheńberinde perspektivada 1 myńǵa jýyq jańa jumys ornyn ashý josparlanýda.
Foto:primeminister.kz
Oljas Bektenov Shanhai qalasynda Chjantszian ǵylymi qalasynyń «Robottar alqabynda» bolyp, densaýlyq saqtaý, ónerkásip jáne qyzmet kórsetý salalaryndaǵy Qytai robototehnika indýstriiasynyń sońǵy jetistikterimen tanysty. Qazirgi ýaqytta atalǵan ǵylymi-tehnologiialyq ortalyqta 80-nen astam qytailyq jáne sheteldik robototehnika kásiporyndary jumys isteidi. Robottardyń keń aýqymy, onyń ishinde gýmanoidtar da usynylǵan. Olardyń qoldanylý aiasy: kúndelikti ómirde kómek kórsetý men qoǵamdyq oryndarda tártipti qamtamasyz etýden bastap, meditsina, bilim berý, indýstriialyq, ǵylymi-zertteý salalarynda, qutqarý jumystary, logistika jáne basqa da salalarǵa deiin keńeiip keledi.Premer-ministr Tsifrlyq damý, innovatsiia jáne aeroǵarysh ónerkásibi ministrligine «Robottar alqabynyń» tájiribesin zerdeleý jáne ony odan ári elimizde qoldaný maqsatynda qytai tarapymen yntymaqtastyqty jolǵa qoiýdy tapsyrdy.
Sensetime kompaniiasynyń keńsesine barǵan kezde qazaqstandyq delegatsiia aqyldy ári qaýipsiz qala jobalarynda qoldanylatyn jańa sheshimder men jabdyqtardy tanystyrdy.
