Memleket basshysynyń tapsyrmasy boiynsha Premer-Ministr Oljas Bektenov Qazaqstan Respýblikasynyń tóraǵalyǵymen ótkiziletin Halyqaralyq Araldy qutqarý qory basqarmasynyń birinshi otyrysyna qatysýshy elder delegatsiialary basshylarymen kezdesý ótkizdi. Bul týraly Úkimettiń baspasóz qyzmeti habarlady.
Kezdesý barysynda transshekaralyq sý resýrstaryn birlesip paidalaný máseleleri, sondai-aq Aral teńizi basseinindegi ekologiialyq jáne áleýmettik-ekonomikalyq máselelerdi odan ári sheshý sharalary qaraldy.
Qazaqstan 2024-2026 jyldar aralyǵynda Halyqaralyq Araldy qutqarý qorynyń tóraǵasy bolyp sanalady.
«Búginde memleketterimizdiń basshylary sý salasyna erekshe kóńil bólip otyr. Qazaqstan Prezidenti Qasym-Jomart Toqaev Araldy qutqarý uzaqmerzimdi halyqaralyq yntymaqtastyqtyń basym baǵytyna ainalýy tiis ekenin basa aitty. Qordyń basty mindeti – Ortalyq Aziianyń sý-energetikalyq resýrstaryn qorǵaý, olardyń áleýmettik-ekonomikalyq, energetikalyq, irrigatsiialyq jáne ekologiialyq mańyzdylyǵyn eskere otyryp, olardy keshendi ári utymdy paidalaný. Ortaq kúsh-jigerimizdiń arqasynda elderimiz úshin mańyzdy sanalatyn biregei sý aidynynyń jaǵdaiyn sapaly túrde jaqsarta alamyz dep úmittenemin», — dep atap ótti Oljas Bektenov.
Qabyldanyp jatqan sharalarǵa qaramastan, Aral teńizi basseinindegi sý resýrstarynyń, onyń ishinde klimattyń ózgerýine bailanysty ósip kele jatqan tapshylyǵyn eskere otyryp, HAQQ aldynda múddeli memleketterdiń shoǵyrlanýyn kúsheitý mindeti tur.
QR Premer-Ministr Oljas Bektenov óńirlik yntymaqtastyq institýtynyń mańyzdy róline toqtalyp, HAQQ múshe memleketteri basshylary Qazaqstannyń tóraǵalyq etý kezeńinde Qordyń aldyna qoiǵan basym mindetterin atap ótti.
Barlyq taraptyń múddesin eskere otyryp, Ortalyq Aziiadaǵy sý-energetikalyq yntymaqtastyqtyń keshendi jáne ózara tiimdi tetigin odan ári pysyqtaý qajettigi atap ótildi. Atap aitqanda, jańa tsifrlyq tehnologiialardy engizý, jerdi qashyqtan zondtaýdyń spýtniktik derekterin paidalaný – yntymaqtastyqty nyǵaitýǵa jáne sý resýrstarynyń edáýir kólemin únemdeýge múmkindik beredi.
Budan basqa, energetikalyq jáne irrigatsiialyq protsesterdi retteýdiń tiimdiligin arttyrý maqsatynda óńir elderiniń Aral teńizi basseininde sý resýrstaryn esepke alýdyń, monitoring júrgizýdiń, basqarýdyń jáne bólýdiń biryńǵai avtomattandyrylǵan júiesin ázirleý ári engizý jónindegi jumys jandanatyn bolady. Bul sharalar memleketterdiń qajettiligin jabýdaǵy tepe-teńdikke qol jetkizýge jáne kúzgi-qysqy kezeńde elektr energiiasynyń, jazǵy kezeńde sýarmaly sýdyń tapshylyǵyna jol bermeýge baǵyttalǵan.
Sondai-aq basym mindetter qatarynda – HAQQ uiymdyq qurylymyn jáne sharttyq-quqyqtyq bazasyn jetildirý protsesin aiaqtaý tur. Búgingi tańda sarapshylardyń jumys toby tiisti jumys júrgizýde.
Kezdesý barysynda Tájikstan Premer-Ministriniń orynbasary Ziiozoda Sýlaimon, Túrikmenstan Ministrler Kabineti Tóraǵasynyń orynbasary Tangrygýli Atahallyev, Ózbekstan Prezidentiniń Keńesshisi Shýhrat Ganiev usynystaryn aitty.
Talqylaý qorytyndysy boiynsha Oljas Bektenov óńirdiń ekojúiesin jaqsartý jónindegi jalpy iske qosqan úlesi úshin delegatsiia basshylaryna alǵysyn bildirip, Qazaqstan Úkimetiniń birlesken josparlardy iske asyrý úshin syndarly dialogqa múddeli ekenin atap ótti.
Anyqtama:
Halyqaralyq Araldy qutqarý qoryn 1993 jyly Ortalyq Aziianyń bes memleketi – Qazaqstan, Qyrǵyzstan, Ózbekstan, Tájikstan jáne Túrikmenstan qurdy. Uiymdy qurýdaǵy maqsat Araldyń qurǵaýynyń qorshaǵan tabiǵi ortaǵa jáne óńir halqyna teris áserin azaitý jónindegi elderdiń kúsh-jigerin biriktirý boldy. Qor birlesken memleketaralyq ekologiialyq jáne ǵylymi-praktikalyq baǵdarlamalar men jobalardy iske asyrady.
